Fake IAS officer Arrested بڈگام میں جعلی آئی اے ایس افسر ساتھی سمیت گرفتار

پولیس نے بڈگام میں ایک شخص جو اپنے آپ کو انڈین ایڈمنسٹریٹو افسر (آئی اے ایس) کے بطور ظاہر کر رہا تھا، کو ایک مقامی باشندے کے ساتھ دھوکہ دہی کے الزام میں گرفتار کیا ہے۔

بڈگام:جموں و کشمیر پولیس نے وسطی ضلع بڈگام میں ایک شخص جو اپنے آپ کو انڈین ایڈمنسٹریٹو افسر (آئی اے ایس) کے بطور ظاہر کر رہا تھا، کو ایک مقامی باشندے کے ساتھ دھوکہ دہی کے الزام میں گرفتار کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بڈگام پولیس اسٹیشن کو 18 اکتوبر 2023 کو غلام حسن ملک ساکن عالی پورہ پتلی باغ کی طرف سے مبینہ نقالی اسکینڈل کے متعلق ایک تحریری شکایت موصول ہوئی۔

انہوں نے کہا کہ 'درخواست گزار نے الزام لگایا کہ آیوش کول معروف بہ وکی، ساکن روز لین نمبر 6 راج باغ سرینگر نے اپنے آپ کو آئی اے افسر کے بطور ظاہر کرکے مجھ سے میرے بیٹے کو سرکاری نوکری دلوانے کے عوض ساڑھے 6 لاکھ روپیے دھوکہ دہی سے حاصل کئے'۔ترجمان کا کہنا تھا کہ اس شکایت پر پولیس اسٹیشن بڈگام میں آئی پی سی کے متعلقہ دفعات کے تحت کیس درج کرکے تحقیقات شروع کی گئیں۔

انہوں نے کہا کہ 'تفتیش کے دوران بنیادی ملزم آیوش کول کو گرفتار کیا گیا اور یہ بھی انکشاف ہوا کہ کول کا برہان بشیر نامی ایک اور ساتھی بھی ہے جو نند ریش کالونی بمنہ کا رہائشی ہے'۔بیان میں کہا گیا کہ دونوں کول اور برہان کو حراست میں لیا گیا۔پولیس نے لوگوں سے ایسے افراد سے ہوشیار رہنے کی اپیل کی ہے۔