ساورکر سے متعلق راج ناتھ کے بیان پر ہندو مہاسبھا کا اعتراض

وینائک دامودر ساورکر سے متعلق مرکزی وزیر دفاع راج ناتھ سنگھ کے بیان پر مختلف طرح کے رد عمل سامنے آ رہے ہیں۔ اسی ضمن میں اکھل بھارتیہ ہندو مہا سبھا میرٹھ نے ان کے بیان پر سخت ناراضگی ظاہر کرتے ہوئے کہا کہ راج ناتھ سنگھ کو اس بیان پر ہندو مہا سبھا سے معافی مانگنی چاہیے کیونکہ وی ڈی ساورکر پر دیے گئے بیان کا حقیقت سے کوئی تعلق نہیں ہے۔ انہوں نے کہا کہ گاندھی اور ساورکر میں کوئی رابطہ نہیں تھا۔

وی ڈی ساورکر پر لکھی ایک کتاب کے رسم اجرا کے موقع پر وزیر دفاع راج ناتھ سنگھ کے وی ڈی ساورکر سے متعلق اس انکشاف پر اکھل بھارتیہ ہندو مہا سبھا نے سخت اعتراض ظاہر کیا ہے اور راج ناتھ سنگھ سے اپنے اس بیان پر معافی مانگنے کا مطالبہ کیا ہے۔

ہندو مہا سبھا کے قومی نائب صدر پنڈت اشوک شرما نے راج ناتھ سنگھ کے بیان کی نکتہ چینی کرتے ہوئے اسے حقیقت سے کوسوں دور قرار دیا۔ انہوں نے کہا کہ گاندھی جی قطب شمالی تھے تو ساورکر قطب جنوبی تھے۔

اکھل بھارتیہ ہندو مہا سبھا میں وی ڈی ساورکر کو ایک اہم شخصیت کے طور جانا جاتا ہے۔ ایسے میں ساورکر اور گاندھی جی کے درمیان بات چیت ہونے کی بات پر ہندو مہا سبھا میں وزیر دفاع راج ناتھ خلاف ناراضگی دیکھی جا رہی ہے۔