قومی یوم رائے دہندگان کے موقع پر آج ملک کے دیگر اضلاع کے ساتھ ہی اتر پردیش کے ضلع رامپور میں بھی مختلف تقاریب کا اہتمام کرکے لوگوں کو اپنے حق رائے دہی کا استعمال کرنے کے لئے بیدار کیا گیا۔ اس موقع پر مختلف اسکولوں اور مدارس کے طلبہ و طالبات نے رائے دہندگان بیداری ریلی نکال کر عوام کو حق رائے دہی کا استعمال کرنے کی جانب متوجہ کیا۔ رائے دہندگان کو بیدار کرنے والے پیغامات لکھے ہاتھوں میں پلے کارڈس لیے طلبہ قلعہ کے میدان سے گاندھی میدان تک پیدل مارچ کرتے ہوئے چلے۔
خصوصی رپورٹ: قومی یوم رائے دہندگان کا کیوں کیا جاتا ہے اہتمام ریلی کا افتتاح ضلع مجسٹریٹ آنجنئے کمار سنگھ نے ہوا میں غبارے چھوڑ کر کیا۔ رائے دہندگان کو حق رائےدہی کے لئے کیوں بیدار کیا جاتا ہے؟ اور جس طرح سے کچھ برسوں سے یہ بات بھی نوٹس میں آ رہی ہے کہ ملک کی عوام الیکٹرانک ووٹنگ مشین کے سلسلے میں اپنی مایوسی کا اظہار کر رہی ہے کے متعلق پوچھے گئے سوالات پر آنجنئے کمار سنگھ نے کہا کہ ای وی ایم سے متعلق کچھ لوگ غلط فہمیاں پھیلانے کی کوشش کرتے رہے ہیں حالانکہ اس طرح سے ووٹنگ کرنے کا عمل بہت ہی صاف و شفاف ہے۔
واضح رہے کہ یوم رائے دہندگان کا اہتمام انتخابی کمیشن کے یوم تاسیس کے موقع پر پورے ملک میں 25 جنوری کو سال 2011 سے ہر سال کیا جاتا ہے۔ رائے دہندگان بیداری ریلی میں مدارس کے طلبہ و اساتذہ نے بھی بڑھ چڑھ کر حصہ لیا اور جمہوریت کو مضبوط کرنے کے لئے رائے دہندگان کو بیدار کیا۔
اس سال کے رائے دہندگان کے قومی دن کا موضوع ہے "اپنے ووٹرس کو بااختیار، چوکس، محفوظ اور باخبر بنانا"۔ اس مرتبہ کے کووڈ۔19 عالمی وباء کے دوران انتخابات محفوظ طریقہ سے کرائے جانے کے انتخابی کمیشن کے عہد پر بھی توجہ مرکوز کی جا رہی ہے۔
