ریاست گجرات میں توکتے طوفان سے ہونے والی تباہی کے بعد ایک طرف ریاستی حکومت کی جانب سے متاثرین کو امداد فراہم کی جا رہی ہے تو دوسری جانب اسلامک ریلیف کمیٹی گجرات نے بھی متاثرہ اضلاع کا سروے کرکے متاثرین کو امداد پہنچانے کا کام شروع کر دیا ہے۔
اسلامک ریلیف کمیٹی گجرات کی جانب سے توکتے طوفان کے متاثرین کی امداد اس تعلق سے اسلامک ریلیف کمیٹی گجرات کے سیکرٹری محمد عمر وہرا نے بتایا کہ اسلامک ریلیف کمیٹی گجرات پہلی رجسٹرڈ مسلم این جی او ہے۔ 1992 میں بھی بابری مسجد کی شہادت کے بعد بلا تفریق تمام مذاہب کے لوگوں کے لیے امداد کا کام انجام دیا تھا۔
انہوں نے کہا 'اس تنظیم نے انسانی آفت ہو یا قدرتی آفات تمام اوقات میں کام کیا ہے، خاص طور سے 2001 کے زلزلے اور 2002 کے فرقہ وارانہ فسادات میں ہماری تنظیم نے ہر ممکن امداد کا کام کیا ہے۔'
انہوں نے کہا کہ ایک طرف لوگ کورونا وائرس کی دوسری لہر سے پریشان ہیں تو دوسری جانب توکتے طوفان نے گجرات کے ساحلی علاقوں میں تباہی مچا دی۔ اس دوران حکومت نے جو امداد کا اعلان کیا وہ اصل نقصان سے بہت کم ہے۔ ایسے میں ان کی تنظیم نے اونا، امریلی، سالایا اور دھرول علاقوں میں سروے کیا۔ یہاں فوری ریلیف کا کام شروع کر کے 600 سے زائد راشن کٹس ان علاقوں میں اب تک تقسیم کی جا چکی ہیں۔
فی الحال ان علاقوں میں 1000 شیڈ، 25 ہزار نلیوں اور 600 راشن کٹس تقسیم کرنے کی ضرورت ہے۔ اس کے لیے فوری طور پر 12 لاکھ روپے کا بجٹ بنایا گیا ہے۔ ایسے میں لوگوں سے اپیل ہے کہ وہ جلد از جلد متاثرین تک امداد پہنچانے کے لیے اپنی رقم ہم تک پہنچائیں.
