రాష్ట్రంలో నిర్మాణంలో ఉన్న రెండు పడక గదుల ఇళ్లను పూర్తి చేసేందుకు తెలంగాణ హౌసింగ్‌ కార్పొరేషన్‌ మరో రూ.2 వేల కోట్ల రుణం ఇవ్వాలని ‘హడ్కో’ని కోరింది. ఈ పథకానికి ఇప్పటికే హడ్కో (హౌసింగ్‌ అండ్‌ అర్బన్‌ డెవలప్‌మెంట్‌ కార్పొరేషన్‌) రూ.8 వేల కోట్ల రుణం ఇచ్చింది. రాష్ట్రాలు కార్పొరేషన్ల పేరుతో తీసుకుంటున్న రుణాలను సైతం ఎఫ్‌ఆర్‌బీఎం పరిధిలో లెక్కిస్తామని కేంద్ర ప్రభుత్వం నూతన నిబంధన తెచ్చిన విషయం తెలిసిందే. ఈ నేపథ్యంలో కొత్త అప్పు మంజూరుపై హడ్కో.. రిజర్వ్‌ బ్యాంక్‌ ఆఫ్‌ ఇండియా (ఆర్బీఐ)ని సంప్రదించింది. దీంతో ఇప్పుడు ఆర్బీఐ స్పందన కీలకం కానుంది. హడ్కో అధికారులను కలిసేందుకు రాష్ట్ర హౌసింగ్‌ కార్పొరేషన్‌ ఎండీ సునీల్‌శర్మ ఈ నెల 23న దిల్లీకి వెళుతున్నారు.
బడ్జెట్‌లో రూ.11 వేల కోట్ల ప్రతిపాదన..పేదల కోసం రాష్ట్ర ప్రభుత్వం 2,91,057 గృహాలు మంజూరు చేసింది. వీటిలో దాదాపు 15వేల ఇళ్లను లబ్ధిదారులకు ఇచ్చారు. ఈ ఏడాది బడ్జెట్‌లో నిర్మాణంలో ఉన్న ఇళ్లతో పాటు సొంత జాగా ఉన్న వారికి రూ.3 లక్షల సాయం కలిపి రూ.11 వేల కోట్లు ప్రతిపాదించింది.