బాలీవుడ్ నటుడు విక్కీ కౌశల్... ప్రస్తుతం హిందీ చిత్రసీమలో విలక్షణ కథలతో దూసుకెళ్తోన్న యువ నటుడు. అతడు నటించిన 'ఉరి: ది సర్జికల్‌ స్ట్రైక్‌’' చిత్రం ప్రేక్షకులను బాగా ఆకట్టుకుంది. ఈ సినిమాలో మేజర్‌ విహాన్‌ సింగ్ సెర్గిల్‌గా నటించి మెప్పించాడు. అయితే విక్కీ, బాలీవుడ్ బార్బీ కత్రినా కైఫ్‌ల ప్రేమ బంధంపై కొన్ని వార్తలు హల్‌చల్‌ చేస్తున్నాయి. దీనిపై తాజాగా ఈ హీరో స్పందించాడు.
" ఓరోజు ఉదయాన్నే నిద్ర లేచేసరికి అమ్మనాన్నలు డైనింగ్‌ టేబుల్‌ దగ్గర ఉన్నారు. నన్ను అదే పనిగా చూస్తున్నారు. నేను వారి దగ్గరికి వెళ్లి ఓ వార్తాపత్రికను తిరగేశాను. అందులో కత్రినా, విక్కీకి ఏదో బంధం ఉందని రాశారు. నేను అలా ఉండిపోయాను. నన్ను అదే పనిగా కోపంగా చూస్తూ ఉన్న అమ్మనాన్నలు... ఒక్కసారిగా గొల్లుమని నవ్వారు. హమ్మయ్య అయితే వీళ్లు ముందే వార్త చదివారా అని ఒక్కసారిగా ఊపిరి పీల్చుకున్నా. కత్రినాతో నాకు ఎలాంటి బంధం లేదు. కేవలం మేమిద్దరం స్నేహితులం మాత్రమే".
-- విక్కీ కౌశల్, బాలీవుడ్ హీరో