An unused textile park in Mylavaram: రాష్ట్రంలో వ్యవసాయం తర్వాత చేనేత రంగమే అతి పెద్ద పరిశ్రమ. చేనేతను నమ్ముకుని వేలాది మంది కార్మికులు జీవనం సాగిస్తున్నారు. చేనేత కార్మికులకు ఉపాధి అవకాశాలు మెరుగుపరిచేందుకు మైలవరంలో టెక్స్టైల్ పార్కును నిర్మించారు. భవనాలు పూర్తి అయిన.. ఇప్పటివరకూ ప్రభుత్వం గానీ. అధికారులు గానీ, ఎమ్మెల్యేలు గానీ పట్టించుకోకపోవడంతో ప్రారంభానికి నోచుకోక సుమారు 15 ఏళ్లుగా నిరుపయోగంగా పడి ఉంది.
వైఎస్సార్‌ జిల్లా మండల కేంద్రమైన మైలవరంలో 2005 మే 24వ తేదీన అప్పటి ముఖ్యమంత్రి వైఎస్ రాజశేఖర్ రెడ్డి టెక్స్టైల్ పార్క్ కోసం శిలాఫలకం వేశారు. చేనేత కార్మికుల సంక్షేమాన్ని దృష్టిలో పెట్టుకొని 62.18 ఎకరాల్లో భవన నిర్మాణ పనులు చేపట్టారు. వీటికోసం ప్రభుత్వం 7.9 కోట్ల రూపాయలు ఖర్చు చేసింది. ఈ పార్కులో మొత్తం 118 ప్లాట్లు ఏర్పాటు చేయగా.. 43 ప్లాట్లకు ఔత్సాహిక పారిశ్రామివేత్తలు ఆ సమయంలోనే అడ్వాన్సులు చెల్లించారు.
ఆ తరువాత అడ్వాన్స్ రూపంలోనే 8 లక్షల 86 వేల రూపాయలు ప్రభుత్వానికి ఆదాయం సమకూరింది. దీంతో అధికారుల అలసత్వం, పాలకుల నిర్లక్ష్యం కారణంగా ఆ భవనాలు నేటికీ ప్రారంభానికి నోచుకోలేదు. సుమారు 15 ఏళ్లుగా ఆ పార్కును ఎవ్వరూ పట్టించుకోకపోవడంతో శిథిలావస్థకు చేరుకుంది. పార్క్ ఆవరణమంతా పిచ్చి మొక్కలతో నిండిపోయింది. విద్యుత్ స్తంభాలు పడిపోయాయి. తలుపులకు చెదలు పట్టాయి. ప్రభుత్వాలు మారినా.. పార్కు రూపురేఖలు మాత్రం మారడంలేదని స్థానికులు ఆరోపిస్తున్నారు.