ఎస్ఈబీ అధికారుల తనిఖీల్లో లక్షల రూపాయలు విలువచేసే మద్యం పట్టుబడిన ఘటన ప్రకాశం జిల్లా వేటపాలెం మండలంలో జరిగింది. మద్యం అక్రమ రవాణాపై ముందస్తు సమాచారం అందుకున్న ఎస్ఈబీ అధికారులు ఒంగోలు-వేటపాలెం బైపాస్ రహదారిలో వాహనాల తనిఖీలు చేపట్టారు. ఒంగోలు నుంచి కఠారిపాలెం క్రాస్ రోడ్డులో రొయ్యలు రవాణా చేసే కంటైనర్ను తనిఖీ చేశారు. ఈ తనిఖీలో భారీగా మద్యం కేసులను గుర్తించారు.
కంటైనర్లో పట్టుబడిన అక్రమ మద్యం వేటపాలెం మండలం పొట్టి సుబ్యయ్యపాలెంకు చెందిన ప్రళయ కావేరి వెంకటేశ్వర్లు అనే వ్యక్తికి చెందినదిగా గుర్తించారు. 156 బాక్సుల్లో 6,120 మద్యం సీసాలను స్వాధీనం చేసుకున్నట్లు సెబ్ సూపరింటెండెంట్ ఆవులయ్య తెలిపారు. వీటిని గోవా(ILLICIT GOA LIQUOR CAUGHT BY SEB OFFICIALS) నుంచి అక్రమంగా తీసుకొస్తున్నట్లు ఆయన తెలిపారు. పట్టుబడ్డ మద్యం విలువ రూ. 13.52 లక్షలు ఉంటుందని పేర్కొన్నారు. కంటైనర్ డ్రైవర్ను అరెస్టు చేసిన అధికారులు.. ప్రధాన నిందితుడు ప్రళయ కావేరి వెంకటేశ్వర్లును త్వరలోనే పట్టుకుంటామని ఆవులయ్య వెల్లడించారు.