మూడో రోజు రైతుల వెంట.. రాజకీయ పార్టీలు
POLITICAL SUPPORT TO FARMERS : రాజధాని రైతుల పాదయాత్రలో వివిధ రాజకీయ పార్టీల నాయకులు పాల్గొన్నారు. తెలుగుదేశం నుంచి మాజీ మంత్రి నక్కా ఆనందబాబు, ఆలపాటి రాజేంద్రప్రసాద్, గోరంట్ల బుచ్చయ్యచౌదరి, తెనాలి శ్రావణ్‌కుమార్, జీవీ ఆంజనేయులు.. రైతుల వెంట నడిచారు. అసెంబ్లీ సాక్షిగా అమరావతికి ఒప్పుకుని.. ఇప్పుడు మూడు రాజధానులు అనడం ప్రజలను వంచించడమేనని ఆనంద్ బాబు అన్నారు.
పాదయాత్రను అడ్డుకునేందుకు ప్రభుత్వం పోలీసుల ద్వారా ప్రయత్నిస్తోందని తెనాలి శ్రావణ్ కుమార్ ఆరోపించారు. ప్రభుత్వానికి ఏమాత్రం చిత్తశుద్ధి ఉన్నా.. హైకోర్టు తీర్పును అమలు చేయాలని జీవీ ఆంజనేయులు డిమాండ్ చేశారు. రైతుల పాదయాత్ర కోసం జీవీ ఆంజనేయులు రూ.5 లక్షలు విరాళం అందజేశారు. ముఖ్యమంత్రికి మూడు రాజధానులు కావాలంటే అసెంబ్లీ రద్దు చేసి ఎన్నికలకు వెళ్లాలని బుచ్చయ్య చౌదరి సవాలు విసిరారు.