வேலூர்: காட்பாடி தொகுதிக்குட்பட்ட சேர்காடு பகுதியில் உயர் கல்வித்துறை சார்பில் ரூ.12 கோடியே 46 லட்சம் நிதி ஒதுக்கீட்டின் கீழ் சேர்காடு அரசு கலை மற்றும் அறிவியல் கல்லூரிக்கு புதிய கட்டடம், மருத்துவம் மற்றும் நல்வாழ்வுத்துறை சார்பில் 14 கோடியே 30 லட்சம் மதிப்பீட்டில் 60 படுக்கைகள் கொண்ட அரசு மருத்துவமனைக்கு புதிய கட்டடம் உள்ளிட்டவைகளுக்கான அடிக்கல் இன்று (பிப்.10) நாட்டப்பட்டது. இந்நிகழ்ச்சியில் காட்பாடி சட்டமன்ற உறுப்பினரும் நீர் வளத்துறை அமைச்சருமான துரைமுருகன், உயர் கல்வித்துறை அமைச்சர் க.பொன்முடி, அரக்கோணம் எம்.பி. ஜெகத்ரட்சகன் ஆகியோர் பங்கேற்று அடிக்கல் நாட்டினர்.
அப்போது விழாவில் பேசிய அமைச்சர் துரைமுருகன், 'காட்பாடியில் உப்புத்தண்ணீர் என்பதால் யாரும் பொண்ணு கொடுக்க மாட்டார்கள்; முதலில் பாலாற்று நீரைக் கொண்டு வந்துள்ளோம். பிறகு காவிரி நீரைக் கொண்டு வந்தோம். அவ்வாறு காவிரி நீர் கிடைக்காத இடங்களுக்கு விரைவில் அவை கொண்டுவரப்படும்' என்றார். மேலும், 'வெள்ளத்தால் அடித்து செல்லப்பட்ட பொன்னை ஆறு மேல்பாடி பாலம் கட்ட பணம் ஒதுக்கிவிட்டேன்; விரைவில் அதற்கும் அடிக்கல் நாட்டப்படும்' என்று கூறினார்.
தற்போது அடிக்கல் நாட்டப்பட்ட இந்த அரசு மருத்துவமனையில் 60 படுக்கைகளைக் கொண்டதாகவும், மேலும் இங்கு 100 படுக்கைகள் கொண்டுவரப்படும் எனவும்; அதற்கான வசதிகள் விரைவில் அமைக்கப்படும் எனவும் தெரிவித்துள்ளார். தமிழ்நாடு பட்ஜெட்டுக்குப் பிறகு முதலமைச்சர் மு.க.ஸ்டாலினிடம் பேசி இந்த ஆண்டுக்குள், இதே சேர்காடு பகுதியில் ஒரு 'சிப்காட்' கொண்டுவர உள்ளதாகவும் தெரிவித்தார். அதேபோல், கலைஞர் கருணாநிதி வாங்கி வைத்த 100 ஏக்கர் நிலத்தில், IT பார்க் DELL தொழிற்சாலைக்கு அருகே கொண்டு வருவேன் என்று தெரிவித்தார்.