கன்னியாகுமரி:செங்கல்பட்டு மாவட்டம் கூடுவாஞ்சேரியில் சார்பதிவாளராக பணிபுரிந்து வந்தபோது, வருமானத்துக்கு அதிகமாக சொத்து சேர்த்ததாக 2020ஆம் ஆண்டு வழக்குப் பதிவு செய்யப்பட்டதன் எதிரொலியாக, சார்பதிவாளர் தானுமூர்த்தியின் வீடு மற்றும் உறவினர் வீடுகளில் செங்கல்பட்டு மற்றும் நாகர்கோவில் லஞ்ச ஒழிப்பு பிரிவு போலீசார் திடீர் சோதனையில் ஈடுபட்டனர். இந்த சோதனையில் சில முக்கிய ஆவணங்கள் சிக்கியதாக தகவல் வெளியாகியுள்ளது.
கன்னியாகுமரி நாகர்கோவில் சைமன் நகர் பகுதியைச் சேர்ந்தவர், தாணுமூர்த்தி (58). இவர் தென்காசி மாவட்டம் ஊத்துமலை பகுதியில் பத்திரப்பதிவு அலுவலகத்தில் சார்பதிவாளராக வேலை பார்த்து வருகிறார். தாணுமூர்த்தி கடந்த 2018-ஆம் ஆண்டு முதல் 2020ஆம் ஆண்டு வரை செங்கல்பட்டு மாவட்டம் கூடுவாஞ்சேரி சார்பதிவாளர் அலுவலகத்தில் வேலை பார்த்து வந்தார்.
அப்போது 2020ஆம் ஆண்டு டிசம்பர் மாதம் லஞ்ச ஒழிப்பு போலீசார் நடத்திய திடீர் சோதனையில் 11 லட்சத்து 55 ஆயிரத்து 400 ரூபாய் பறிமுதல் செய்யப்பட்டது. மேலும், அன்றைய தினம் அவருடைய வீட்டில் நடத்திய சோதனையில், அங்கிருந்த 114 பவுன் தங்க நகைகளை லஞ்ச ஒழிப்பு போலீசார் கைப்பற்றினர். இது தொடர்பாக லஞ்ச ஒழிப்பு போலீசார் விசாரணை மேற்கொண்டு வந்தனர்.
இந்நிலையில், தாணுமூர்த்தி மீது நேற்று லஞ்ச ஒழிப்பு போலீசார் வழக்குப் பதிவு செய்து, அவரது வீடுகளில் சோதனை நடத்த முடிவு செய்தனர். இதை அடுத்து, குமரி மாவட்டத்தில் உள்ள 2 இடங்களில் லஞ்ச ஒழிப்பு ஏ.டி.எஸ்.பி. ஹெக்டேர் தர்மராஜ் தலைமையிலான போலீசார் நேற்று (நவ.7) காலை அதிரடியாக சோதனை மேற்கொண்டனர்.