தஞ்சாவூர்:விடுதலைப் போராட்ட வீரரும், கம்யூனிஸ்ட் கட்சியின் மூத்த தலைவருமான, பி.ராமமூர்த்தியின் நினைவு தினத்தை முன்னிட்டு, இன்று(டிச.15) மாலை கும்பகோணத்தில் செஞ்சட்டை பேரணியும், பொதுக்கூட்டமும் நடைபெற உள்ளது.
இதில், மார்க்சிஸ்ட் கம்யூனிஸ்ட் கட்சியின் மத்தியக்குழு உறுப்பினர் உ.வாசுகி கலந்து கொண்டு சிறப்புரையாற்ற வருகை தந்துள்ளார். பின் செய்தியாளர்களிடம் பேசிய உ.வாசுகி, “நாடாளுமன்ற வளாகத்தில், பாதுகாப்பு குறைபாடு ஏற்படக் காரணமாக இருந்து, பிரச்சனைக்குரியவர்களுக்கு பாஸ் வழங்கிய பாஜக எம்.பி பிரதாப் சின்கா மீது எந்த வித நடவடிக்கையும் எடுக்கவில்லை. அவர் வழக்கம் போல நாடாளுமன்ற கூட்டத்தொடரில் பங்கேற்று வருகிறார்.
அதே வேளையில், பாதுகாப்பு குறைபாடு குறித்து விசாரணைகோரிய நாடாளுமன்ற உறுப்பினர்களை சஸ்பெண்ட் செய்து நாடாளுமன்ற உறுப்பினர்களுக்கான கேள்வி கேட்கும் உரிமை, பேச்சுரிமை, கருத்துரிமை ஆகியவற்றை நாடாளுமன்றத்தில் பாஜக அரசு தடுத்துள்ளது.
இது தலையாட்டி பொம்மையாக நாடாளுமன்றம் செயல்படுகிறதோ என எண்ணத் தோன்றுகிறது. உச்ச நீதிமன்றத்தின் ஜம்மு & காஷ்மீர் குறித்த தீர்ப்பு என்பது பாஜகவுடன் இணக்கம் காட்டாத தேர்ந்தெடுக்கப்பட்டுள்ள மாநில அரசின் மாநில உரிமைகளைப் பறிக்கும் வகையில், அதனைக் கலைத்தோ, கவிழ்த்தோ அங்குக் குடியரசுத் தலைவர் ஆட்சியினை அமல்படுத்தி அதன் வாயிலாக, தாங்கள் விரும்புகிற விதமான சட்டத்திருத்தங்களை மேற்கொண்டு ஒரு மாநிலத்தை 2 அல்லது 3 ஆகப் பிரிக்கக் கதவு திறக்கும் தீர்ப்பாகவே இதனைப் பார்க்க வேண்டியுள்ளது.
பாஜகவுடன் இணக்கமாக இல்லாத மாநிலங்களில் உள்ள ஆளுநர்களின் அராஜகம் அதிகரித்தே வருகிறது. ஆளுநர்கள் அனைவரும் ஆர்.எஸ்.எஸ் மற்றும் பாஜகவின் அரசியல் கருவிகளாகவே செயல்படுகின்றனர். சென்னை மழை வெள்ளப் பாதிப்பிற்கு மாநில அரசு ரூ.5,060 கோடி ஒன்றிய அரசிடம் கோரியுள்ள நிலையில், ஒன்றிய அரசு வெறும் ரூ.450 கோடி மட்டுமே ஒதுக்கியுள்ளது. இது வெறும் 10 சதவீதம் கூட இல்லை.
மாநில அரசு கோரிய தொகையினை முழுமையாக ஒன்றிய அரசு வழங்கிட வேண்டும். தமிழகத்திற்கான கருணைத் தொகையாக இல்லாமல், ஒன்றிய அரசின் கடமையாக வழங்கிட முன்வர வேண்டும். மாநில அரசின் நிவாரணம் குடும்ப அட்டைக்கு ரூ.6 ஆயிரம் என்பதனை குடும்ப அட்டை இல்லாமல் பாதிக்கப்பட்டோரும் விடுபடாத வகையில், அனைவருக்கும் கிடைக்கும் வகையில் நடவடிக்கை எடுத்திட வேண்டும்.