மதுரை: மாமன்னர்கள் மருது சகோதரர்களின், 221ஆவது நினைவு நாளை முன்னிட்டு, மதுரையில் தமிழ்ச்சங்கம் சாலையில் உள்ள மருது சகோதரர்களின் சிலைக்கு முன்னாள் அமைச்சர் செல்லூர் ராஜூ மாலை அணிவித்து மரியாதை செலுத்தினார்.
இதனைத்தொடரந்து செய்தியாளர்களைச் சந்தித்த அவர், 'இந்திய சுதந்திரப் போராட்டத்திற்கு வித்திட்டவர்கள் மருதிருவர். அண்ணன், தம்பி பாசத்திற்கும் நட்பிற்கும் உதாரணமாக தங்கள் உயிரை நீத்த மருது சகோதரர்களின் நினைவு நாள் இன்று. அதிமுக சார்பில் வீர வணக்கம் செலுத்தியுள்ளோம். அதிமுக சார்பில் மருது சகோதரர்களின் நினைவிடம் அமைத்தது, அரசு விழாவாக அறிவித்தது முன்னாள் முதலமைச்சர் ஜெயலலிதா தலைமையிலான அதிமுக அரசு' எனத் தெரிவித்தார்.
மேலும் அவர், 'பசும்பொன் முத்துராமலிங்கத்தேவருக்கு தங்க கவசம் அதிமுக சார்பில் மறைந்த முன்னாள் முதலமைச்சர் ஜெயலலிதா வழங்கினார். அப்போது அதிமுக பொருளாளராக யார் இருக்கிறார்களோ, அவர்களே தங்க கவசத்தைப் பெற்று ஒப்படைக்க வேண்டும் என்னும் வகையில் ஏற்பாடு செய்திருந்தார்.