கரூர் மாவட்டம் சனபிரட்டி ஆசிரியர் காலனியில் வசித்துவருபவர் அத்தப்பன். எலக்ட்ரிஷன் வேலைசெய்து வரும் இவர், தனியார் வங்கியில் வீட்டுக் கடன் பெற்று சொந்தமாக வீடு கட்டியுள்ளார். அந்த வீட்டிற்கு வீட்டு வரி நிர்ணயம் செய்து தரக்கோரி கரூர் நகராட்சி அலுவலகத்தில் அத்தப்பன் விண்ணப்பித்துள்ளார்.
அதற்கு வருவாய் உதவியாளர் ரேவதி, வீட்டுவரி நிர்ணயத்திற்கு 40 ஆயிரம் ரூபாய் லஞ்சம் கேட்டுள்ளார். இதற்கு அத்தப்பன், கரோனா பரவி வரும் இந்த நெருக்கடியான காலகட்டத்தில், தாங்கள் கேட்கும் தொகையை உடனடியாகத் தயார்செய்ய முடியாது என்று கூறியுள்ளார். இதைத் தொடர்ந்து வருவாய் உதவியாளர், முதல் தவணையாக பத்தாயிரம் ரூபாய் கொடுக்குமாறும் சான்றிதழ் பெற்றுக்கொண்டவுடன் மீதித் தொகையை வழங்குமாறும் கூறியிருக்கிறார்.