ஈரோடு மாவட்டம் சத்தியமங்கலம் அடுத்துள்ள அடர்ந்த வனப்பகுதியில் தெங்குமரஹாடா, அல்லிமாயாறு, கல்லாம்பாளையம் ஆகிய மூன்று வன கிராமங்களில் ஆயிரத்திற்கும் மேற்பட்ட குடும்பங்கள் வசிக்கின்றன.
அடர்ந்த வனப்பகுதியிலிருக்கும் இந்த வன கிராமங்களில் உள்ள கரடுமுரடான மண் சாலை வழியாக 20 கி.மீ. தூரம் பயணித்து பின்னர் அங்குள்ள மாயாற்றை பரிசலில் கடந்து செல்ல வேண்டிய நிலை உள்ளது.
பல தலைமுறைகளாக வாழ்ந்துவரும் இந்த வனகிராம மக்கள் சாலை வசதி, மாயாற்றின் குறுக்கே உயர்மட்ட பாலம் கட்டித்தர வேண்டும் எனக் கோரிக்கை விடுத்தும் இதுவரை அரசு எந்த நடவடிக்கையும் எடுக்காததால் நேற்று சத்தியமங்கலம் மாவட்ட வன அலுவலகம் முன்பு 100 பெண்கள், 150 ஆண்கள் என 250 பேர் திரண்டு சத்தியமங்கலம் - கோபிசெட்டிபாளையம் சாலையில் ஒரு மணி நேரம் சாலை மறியல் போராட்டத்தில் ஈடுபட்டனர்.
இதனால் கடுமையான போக்குவரத்து பாதிப்பு ஏற்பட்டது. இந்நிலையில் சாலை மறியல் போராட்டத்தில் ஈடுபட்ட வனகிராம மக்கள் மீது சத்தியமங்கலம் காவல் துறையினர் வழக்குப்பதிவு செய்துள்ளனர். அடிப்படை வசதி கேட்டு போராட்டம் நடத்திய வனகிராம மக்கள் மீது வழக்குப்பதிவு செய்யப்பட்டுள்ளதால் வன கிராம மக்கள் அதிர்ச்சியடைந்துள்ளனர்.
இதையும் படிக்க: திம்பம் மலைப்பாதையில் வெங்காயம் லாரி கவிழ்ந்து விபத்து!