சென்னை:தாய்லாந்து தலைநகர் பேங்காக்கில் இருந்து ஏர் ஏசியா பயணிகள் விமானம், சென்னை சர்வதேச விமான நிலையத்திற்கு வந்தது. அப்போது சென்னை விமான நிலைய சுங்க அலுவலர்கள் வழக்கம்போல் சோதனை நடத்திக் கொண்டிருந்தனர். அப்போது 2 பிளாஸ்டிக் கூடைகளோடு சந்தேகத்திற்கிடமாக வந்த நபரை பிடித்து விசாரித்தனர்.
முன்னுக்கு பின் முரணாக பதில் கூறிய அவரை தனியாக அழைத்துச் சென்று அதிகாரிகள் சோதித்தனர். இதில் அவரது உடமைகளில் ஏதும் இல்லை. இருப்பினும் அவர் வைத்திருந்த 2 பிளாஸ்டிக் கூடைகளில், அரிய வகை குரங்கு குட்டிகள் இருப்பது தெரிய வந்தது. இவை மேற்கு ஆப்பிரிக்க வனப்பகுதியில் வசிக்கக்கூடிய சூட்டி மங்காவே மற்றும் காலர்டு மங்காவே என்ற 2 ஆப்பிரிக்க வகை அரிய குரங்கு குட்டிகளாகும்.
இதுகுறித்து சென்னை பெசன்ட் நகரில் உள்ள, ஒன்றிய வன உயிரின குற்றப்பிரிவுக்கு சுங்கத்துறையினர் தகவல் அளித்தனர். பின்னர் மத்திய வன உயிரின குற்றப்பிரிவு அலுவலர்கள் வந்து சோதனை செய்ததில், இந்த ஆப்பிரிக்க வகை குரங்குகள் மிகவும் ஆபத்தானவை என்றும், இவைகள் வெளிநாட்டு நோய்க் கிருமிகள் நிறைந்த வகைகளை சேர்ந்தவை என்றும் தெரிய வந்தது.