சென்னை:ராமேஸ்வரம் அருள்மிகு ராமநாதசுவாமி கோயில் நிர்வாகத்தின் மூலம் ராமேஸ்வரத்திலிருந்து காசிக்கு 300 பேரை ஆன்மிகப் பயணம் அழைத்துச் செல்ல திட்டமிட்டுள்ளதாக இந்து சமய அறநிலையத் துறை அமைச்சர் பி.கே.சேகர் பாபு தெரிவித்துள்ளார்.
இது குறித்து இந்து சமய அறநிலையத் துறை அமைச்சர் பி.கே.சேகர் பாபு தெரிவித்தது. "2022 - 2023ஆம் ஆண்டிற்கான இந்து சமய அறநிலையத் துறை மானியக் கோரிக்கை அறிவிப்பில், "ராமேஸ்வரம், ராமநாத சுவாமி கோயில் நிர்வாகத்தின் மூலம் காசி விஸ்வநாத சுவாமி கோயிலுக்கு இந்த ஆண்டில் 200 நபர்கள் ஆன்மிகப் பயணம் அழைத்துச் செல்லப்படுவர். இதற்கான செலவினத் தொகை ரூ.50 லட்சத்தை அரசே ஏற்கும்" என்று அறிவிக்கப்பட்டது
அதேபோல் இந்த ஆண்டும், பக்தர்களை கருத்தில் கொண்டு, இந்த ஆண்டு 300 நபர்கள் ஆன்மிக பயணம் அழைத்துச் செல்லப்படுவர். இதற்கான செலவினத் தொகை ரூ.75 லட்சத்தை அரசு ஏற்கும். மேலும், இந்த ஆன்மிகப் பயணத்திற்கு அழைத்துச் செல்ல இந்து சமய அறநிலையத்துறையின் 20 இணை ஆணையர் மண்டலங்களில், மண்டலத்திற்கு 15 நபர்கள் வீதம் 300 நபர்களை விண்ணப்பங்கள் மூலம் தேர்வு செய்யப்படும்.