சென்னை: நெடுஞ்சாலை மற்றும் பொதுப்பணித்துறை அமைச்சர் எ.வ.வேலு தலைமையில்,பொதுப்பணித்துறை ஒப்பந்ததாரர்களுடன் கலந்துரையாடல் கூட்டம் நடைபெற்றது. கிண்டியில் உள்ள நெடுஞ்சாலைத்துறை அலுவலகத்தில் நடைற்ற இக்கூட்டத்தில் பொதுப்பணித்துறை செயலாளர் சந்தீப் சக்சேனா உள்ளிட்ட உயர் அலுவலர்கள் கலந்துகொண்டனர்.
இதைத்தொடர்ந்து செய்தியாளர்களை சந்தித்த அமைச்சர் வேலு கூறியதாவது, "அரசின் சார்பாக கட்டப்படும் அனைத்து கட்டடங்களும் ஒப்பந்ததாரர்கள் மூலமாகதான் கட்டப்படுகிறது. கட்டடங்கள் கட்டுவதற்கு ஏற்படும் காலதாமதம் குறித்த ஆய்வு மேற்கொண்டதில் ஒப்பந்ததாரர்களுக்கு சில குறைகள் உள்ளது. எனவே அவர்களின் குறைகளை கேட்கவே இந்த கலந்துரையாடல் கூட்டத்தை நடத்தினோம். தற்போதைய ஒப்பந்த முறையில் மாற்றம் கொண்டு வரவேண்டுமென ஒப்பந்ததாரர்கள் கோரிக்கை விடுத்துள்ளனர்.