சென்னை ராயப்பேட்டையில் முதலமைச்சரின் மினி கிளினிக் திட்டத்தை மீன்வளத்துறை அமைச்சர் ஜெயக்குமார் தொடங்கிவைத்தார். அதனைத்தொடர்ந்து செய்தியாளர்களிடம் கூறிய அமைச்சர் ஜெயக்குமார், பொதுமக்களின் நலனுக்காக அம்மா மினி கிளினிக் திட்டம்தொடங்கப்பட்டுவருகிறது. மக்களின் நலனை கருத்தில் கொண்டு ஞாயிற்றுக்கிழமை என பாராமலும் நாங்கள் தொடர்ந்து பணி செய்து வருகிறோம்.
சசிகலா மற்றும் அவரை சார்ந்தவர்களை அதிமுகவில் மீண்டும் இணைத்துக்கொள்ள வாய்ப்பே இல்லை. முதலமைச்சரின் நிலைப்பாட்டில் நாங்கள் தொடர்ந்து நீடிக்கிறோம். சசிகலா கட்சிக்கு தேவையில்லை என்ற நிலைபாட்டில் நேற்றும் இன்றும் நாளையும் எந்த மாற்றமும் இல்லை.
சசிகலா வருகையால் அவர் சேர்த்து வைத்த சொத்துகளை கொள்ளை அடித்த டிடிவி தினகரன்தான் பதற்றத்தில் உள்ளார். ஈ, கொசுவுக்கு எல்லாம் நாங்கள் அச்சப்படுவதில்லை. சசிகலா அதிமுக அலுவலகத்தில் நுழைந்தால் நிச்சயம் சட்டப்படி நடவடிக்கை மேற்கொள்ளப்படும்.