சென்னை: வீடுகளில் பயன்படுத்தப்படும் சமையல் எரிவாயு சிலிண்டர் விலை நேற்று 25 ரூபாய் உயர்ந்தது. இதனால் தமிழ்நாட்டில் சிலிண்டர் விலை ரூ. 900ஐ தாண்டியுள்ளது.
சர்வதேச சந்தையில் கச்சா எண்ணெய் விலை, அமெரிக்க டாலருக்கு நிகராக இந்திய ரூபாயின் மதிப்பு ஆகியவற்றைக் கொண்டு, எண்ணெய் நிறுவனங்கள், சமையல் எரிவாயு சிலிண்டர் விலையை நிர்ணயம் செய்கின்றன. கடந்த ஆண்டு டிசம்பர் மாதத்தில் வீட்டு உபயோக சிலிண்டரின் விலை ரூ.50 உயர்த்தப்பட்டு ரூ.660க்கு விற்கப்பட்டது.
சிலிண்டர் விலை தொடர்ந்து உயர்வு
பின்னர், இந்த ஆண்டு பிப்ரவரி மாதத்திலிருந்து சிலிண்டர் விலை தொடர்ந்து உயர்ந்து வருகிறது. அதன்படி வீடுகளில் பயன்படுத்தப்படும் 14.2 கிலோ எடை கொண்ட சிலிண்டர் விலை தற்போது ரூ.900ஐ தாண்டி விற்கப்படுகிறது. இதேபோல் வணிக ரீதியான சிலிண்டர் விலையும் ரூ.75 உயர்ந்து ரூ.1,831க்கு விற்பனை செய்யப்படுகிறது.