EVKS Elangovan: சட்டப்பேரவை நிகழ்வில் பங்கேற்ற ஈரோடு கிழக்கு எம்.எல்.ஏ ஈவிகேஎஸ் இளங்கோவன்!

ஈரோடு கிழக்கு தொகுதி சட்டமன்ற உறுப்பினர் ஈவிகேஎஸ் இளங்கோவன் இன்று சட்டப்பேரவைக்கு வருகை தந்தார். மருத்துவமனையிலிருந்து டிஸ்சார்ஜ் செய்யப்பட்ட பிறகு வீட்டில் ஓய்வில் இருந்த அவர் இன்று பேரவை விவாதத்தில் கலந்து கொண்டார்.

சென்னை:ஈரோடு கிழக்கு தொகுதி சட்டமன்ற உறுப்பினரும், தமிழ்நாடு காங்கிரஸ் கமிட்டி முன்னாள் தலைவருமான ஈ.வி.கே.எஸ் இளங்கோவன் கடந்த மார்ச் 15 ஆம் தேதி உடல் நலக்குறைவால் மருத்துவமனையில் அனுமதிக்கப்பட்டார் தீவிர சிகிச்சைக்கு பிறகு கடந்த வாரம் அவர் மருத்துவமனையில் இருந்து டிஸ்ச்சார்ஜ் செய்யப்பட்டு வீடு திரும்பினார். மருத்துவமனையில் சிகிச்சை பெற்று வந்த காரணத்தினால் தமிழக சட்டமன்ற பட்ஜெட் கூட்டத்தொடரில் அவரால் கலந்துக் கொள்ள முடியாத சூழ்நிலை ஏற்பட்டது.

மருத்துவமனையில் இருந்து டிஸ்ச்சார்ஜ் செய்யப்பட்டு தனது இல்லத்தில் ஓய்வில் இருந்த ஈரோடு கிழக்கு தொகுதி காங்கிரஸ் சட்டமன்ற உறுப்பினர் ஈ .வி.கே.எஸ் இளங்கோவன் கடந்த 12 ஆம் தேதி சட்டமன்றத்திற்கு வருகை தந்தார். சிறிது நேரம் காங்கிரஸ் கட்சி சட்டமன்ற அலுவலகத்தில் அமர்ந்து இருந்த அவர் சட்டமன்றத்தில் சட்டமன்ற உறுப்பினர்களுக்கான வருகை பதிவேட்டில் கையெழுத்திட்ட பின்பு மீண்டும் தனது இல்லத்திற்கு புறப்பட்டு சென்றார்.

இதனையடுத்து தனது இல்லத்தில் ஓய்வில் இருந்த ஈரோடு சட்டமன்ற உறுப்பினர் ஈ.வி.கே.எஸ் இளங்கோவன் சட்டமன்ற கூட்டத்தில் கலந்து கொள்ள இன்று சட்டபேரவைக்கு வருவை தந்தார். அவருக்கு சட்டமன்ற காங்கிரஸ் கட்சி தலைவர் செல்வப்பெருந்தகை மற்றும் காங்கிரஸ் சட்டமன்ற உறுப்பினர்கள் ருபி மனோகரன், துரை சந்திரசேகர், மாங்குடி ராதாகிருஷ்ணன் உள்ளிட்ட பலர் பொன்னாடை போர்த்தி வரவேற்றனர்.

அதன் பின்னர் சட்டமன்ற கூட்டத்தில் கலந்து கொள்ள அவைக் கூட்டத்திற்கு சென்ற அவர் தனது வெற்றிக்காக பிரச்சாரம் மேற்கொண்ட அமைச்சர்களுக்கு நேரில் சந்தித்து நன்றி தெரிவித்தார். அதனையடுத்து காவல்துறை மற்றும் தீயனைப்புத்துறை மானியக்கோரிக்கை மீதான விவாதத்தின் மீதான முதலமைச்சரின் பதிலுரையில் தற்போது கலந்து கொண்டார்.