சென்னை: இந்தியாவில் ஆட்சிப் பொறுப்பேற்று ஓராண்டு நிறைவடைந்த ஐந்து மாநிலங்களின் முதலமைச்சர்களில் தமிழ்நாடு முதலமைச்சர் மு.க.ஸ்டாலினின் செயல்பாடுகள்தான் அதிக மக்களின் ஆதரவையும் திருப்தியையும் பெற்றுள்ளதாக பிரபல ஐ.ஏ.என்.எஸ்- சி வோட்டர்ஸ் நிறுவன கருத்துக்கணிப்பு புள்ளி விவரங்களுடன் தெரிவித்துள்ளது.
தமிழ்நாடு, அசாம், மேற்கு வங்காளம், கேரளா மற்றும் புதுச்சேரி ஆகிய 5 மாநிலங்களுக்கு கடந்த 2021 ஆம் ஆண்டு ஆண்டு ஏப்ரல், மே மாதங்களில் சட்டப்பேரவை தேர்தல் நடத்தப்பட்டது. இந்த மாநிலங்களில் புதிய அரசுகள் ஆட்சிப்பொறுப்பேற்று ஓராண்டு நிறைவடைந்துள்ள நிலையில், முதலமைச்சர்களின் செயல்பாடுகள் மீது அந்தந்த மாநில மக்கள் எந்தளவிற்கு திருப்தி தெரிவிக்கிறார்கள் என பிரபல சி வோட்டர்ஸ் நிறுவனம் கருத்துக்கணிப்பு ஒன்றை நடத்தியது.
இந்த கருத்துக்கணிப்பில் ஒரே ஆண்டில் மக்களின் ஆதரவை பெற்ற முதலமைச்சர் பட்டியலில் தமிழக முதலமைச்சர் மு.க.ஸ்டாலின் இடம் பெற்றுள்ளார் என தெரிவிக்கப்பட்டுள்ளது. மேலும் ஸ்டாலின் தனது செயல்பாடுகளால் அதிகப்படியான மக்களின் ஆதரவை பெற்று முதலிடத்தில் இருக்கிறார் எனவும் அவரது செயல்பாடு குறித்து சுமார் 85 விழுக்காடு தமிழ்நாட்டு மக்கள் திருப்தியாகவும் மகிழ்ச்சியாகவும் உள்ளனர் என கருத்துக்கணிப்பில் கூறப்பட்டுள்ளது.
இதில் 40.72 விழுக்காட்டினர் ஸ்டாலின் செயல்பாடுகள் முழுமையான திருப்தியை அளிப்பதாகவும் 43.85 சதவிகிதத்தினர் திருப்தி அளிக்கிறது எனவும் தெரிவித்துள்ளனர். மொத்தத்தில் ஸ்டாலின் தலைமையிலான தமிழ்நாடு அரசின் செயல்பாடுகள் 81 சதவிகித மக்களுக்கு திருப்தியை அளித்திருப்பதாக தெரிவிக்கப்பட்டுள்ளது.
இதற்கு அடுத்தபடியாக அசாம் மாநில முதலமைச்சர் ஹிமந்தா பிஸ்வா சர்மா 77.7 விழுக்காட்டினர் ஆதரவுடன் இரண்டாம் இடத்திலும், கேரள முதலமைச்சர் பினராயி விஜயன் 72 சதவிகித ஆதரவுடன் மூன்றாம் இடத்திலும் உள்ளனர். இந்த வரிசையில் புதுச்சேரி முதலமைச்சர் ரங்கசாமி 61 சதவிகித ஆதரவுடன் நான்காம் இடத்தில் உள்ளதாக சி வோட்டர்ஸ் கருத்துக்கணிப்பு மூலம் தெரியவந்துள்ளது.
பெரும்பாலான வாக்காளர்கள் 35 சதவீதத்திற்கும் அதிகமானோர் மாநிலத்தில் எதிர்க்கட்சித் தலைவரின் செயல்பாட்டில் திருப்தியடையவில்லை என்றும் கணக்கெடுப்பில் தெரியவந்துள்ளது. கருத்துக்கணிப்பில் பங்கேற்றவர்களில் 10 சதவீதம் பேர் மட்டுமே எதிர்க்கட்சித் தலைவரின் செயல்பாடு குறித்து மிகவும் திருப்தி அடைந்துள்ளதாகவும், 42 சதவீதம் பேர் ஓரளவு திருப்தி அடைந்துள்ளதாகவும் தெரிவித்துள்ளனர்.
இதில் தமிழகத்தில் பிரதமர் நரேந்திர மோடி அதிக மதிப்பெண் பெறவில்லை என்பது குறிப்பிடத்தக்கது. கருத்துக்கணிப்பின் போது, பதிலளித்தவர்களில் 40 சதவீதத்திற்கும் அதிகமானோர் பிரதமரின் செயல்பாடு குறித்து திருப்தியடையவில்லை என்று கூறிய நிலையில், 17 சதவீதம் பேர் மட்டுமே அவரது பணியில் மிகவும் திருப்தியாக இருப்பதாக கூறியுள்ளனர். மேலும் பதிலளித்தவர்களில் 40 சதவீதம் பேர் ஓரளவு திருப்தியை வெளிப்படுத்தினர்.
அகில இந்திய காங்கிரஸ் தலைவர் ராகுல் காந்தி எதிர்காலத்தில் பிரதமர் பதவியைப் பிடிப்பதற்கு நரேந்திர மோடியை விட அதிக மதிப்பெண் பெற்றுள்ள மற்றொரு மாநிலம் தமிழ்நாடு என்றும் கருத்துக்கணிப்பில் கூறப்பட்டுள்ளது.
விலைவாசி உயர்வு மற்றும் வேலையில்லாத் திண்டாட்டம் ஆகியவை மாநிலத்தின் மக்களுக்கு கவலையளிக்கும் முக்கிய பிரச்சனைகள் என்று கணக்கெடுப்பு வெளிப்படுத்தியுள்ளது. பதிலளித்தவர்களில் 36 சதவிகிதத்தினர் விலையேற்றம் தங்களின் முக்கிய பிரச்சனை என்றும், சுமார் 12 சதவிகிதத்தினர் மாநிலத்தில் வேலையின்மை தங்களின் முக்கியக் கவலை என்றும் கூறியுள்ளனர்.
கணக்கெடுப்பின் போது, தென் மாநிலத்தைச் சேர்ந்த ஏராளமானோர் எதிர்காலத்தைப் பற்றி நம்பிக்கையுடன் தெரிவித்தனர்/ 45 சதவீதத்திற்கும் அதிகமானோர் அடுத்த ஓராண்டில் தங்கள் வாழ்க்கைத் தரம் மேம்படும் என்று நம்பிக்கை தெரிவித்தாலும், 13 சதவீதம் பேர் மட்டுமே தங்கள் நிலை மோசமடையும் என்று கூறியுள்ளனர். மேலும் நேர்காணல் செய்யப்பட்டவர்களில் 12 சதவீதத்திற்கும் அதிகமானோர் அடுத்த ஒரு வருடத்திற்கு தற்போதைய நிலைமை அப்படியே இருக்கும் என்று கூறியுள்ளனர்.
இதையும் படிங்க :256 நடமாடும் மருத்துவமனை வாகனங்களை முதலமைச்சர் மு.க.ஸ்டாலின் தொடங்கி வைத்தார்!
