ஹர்பஜன் சாதனையை முறியடித்த அஸ்வின்!

இந்திய அணிக்காக சர்வதேச டெஸ்ட் கிரிக்கெட் போட்டியில் விளையாடி சொந்த மண்ணில் அதிக விக்கெட்டுகளைக் கைப்பற்றிய இந்தியர் பட்டியலில் தமிழ்நாட்டைச் சேர்ந்த ரவிச்சந்திரன் அஸ்வின் இரண்டாம் இடத்திற்கு முன்னேறியுள்ளார்.

சென்னை-சேப்பாக்கம் கிரிக்கெட் மைதானத்தில் இந்தியா - இங்கிலாந்து அணிகளுக்கு இடையேயான இரண்டாவது டெஸ்ட் போட்டி நடைபெற்றுவருகிறது. இப்போட்டியின் முதல் இன்னிங்ஸில் இந்திய அணியின் ரவிச்சந்திரன் அஸ்வின், ஐந்து விக்கெட்டுகளைக் கைப்பற்றினார்.

மேலும் சர்வதேச கிரிக்கெட் அரங்கில் 200 இடது கை பேட்ஸ்மேன்களை வீழ்த்திய முதல் இந்தியர் என்ற சாதனையையும் படைத்தார். இந்நிலையில், சொந்த மண்ணில் அதிக டெஸ்ட் விக்கெட்டுகளை வீழ்த்திய இந்திய பந்துவீச்சாளர் பட்டியலில், இந்திய அணியின் முன்னாள் வீரர் ஹர்பஜன் சிங்கைப் பின்னுக்குத் தள்ளி இரண்டாம் இடத்திற்கு முன்னேறியுள்ளார்.

ஹர்பஜன் சிங் இந்தியாவில் விளையாடிய டெஸ்ட் போட்டிகளில் 265 விக்கெட்டுகளைக் கைப்பற்றியிருந்தார். தற்போது தமிழ்நாட்டைச் சேர்ந்த ரவிச்சந்திரன் அஸ்வின் 266 விக்கெட்டுகளைக் கைப்பற்றி முறியடித்துள்ளார். இப்பட்டியலில் இந்திய அணியின் முன்னாள் ஜாம்பவான் அனில் கும்ப்ளே 350 விக்கெட்டுகளைக் கைப்பற்றி முதலிடத்தில் நீடிக்கிறார்.

இது குறித்து பேசிய அஸ்வின், “2000ஆம் ஆண்டு ஹர்பஜன் சிங் இந்திய அணியில் விளையாடுவதைப் பார்த்து ரசித்திருக்கிறேன். ஆனால் நான் இந்திய அணியின் சுழற்பந்துவீச்சாளராக மாறுவேன் என நினைத்துக்கூட பார்த்ததில்லை. ஏனெனில், எனது மாநில அணியில் நான் பேட்ஸ்மேனாக மட்டுமே இருந்தேன்.

நான் இந்திய அணியில் பேட்ஸ்மேனாகத்தான் விளையாடுவேன் என எண்ணிக்கொண்டிருந்தேன். தற்போது இந்திய அணி சுழற்பந்துவீச்சாளராக மாறுவேன் என்று நான் நினைத்துக்கூட பார்த்ததில்லை.

ஆனால் நான் ஹர்பஜன் சிங்கின் சாதனையை முறியடித்திருப்பது நம்ப முடியாத அளவிற்குச் சிறப்பு வாய்ந்தது. உங்களுடைய சாதனையை முறியடித்ததற்கு என்னை மன்னிக்கவும் ஹர்பஜன் சிங்” என்று தெரிவித்துள்ளார்.

இந்திய அணிக்காக 75 டெஸ்ட் போட்டிகளில் விளையாடியுள்ள ரவிச்சந்திரன் அஸ்வின், இதுவரை 386 விக்கெட்டுகளையும், 2500 ரன்களையும் எடுத்துள்ளார். இதில் நான்கு சதங்கள், 11 அரைசதங்கள், 29 ஐந்து விக்கெட்டுகளும் அடங்கும்.

இதையும் படிங்க: ஆஸ்திரேலியன் ஓபன்: காலிறுதியில் செரீனா!