நியூசிலாந்து வெலிங்டன் பேஸின் ரிசர்வ் மைதானத்தில் நடைபெற்ற முதல் டெஸ்ட் போட்டியின் நான்காம் நாள் ஆட்டத்தை இந்திய இன்று விளையாடியது. மூன்றாம் நாள் ஆட்டம் முடிவில் இந்திய அணி 144 ரன்களுக்கு 5 விக்கெட்டுகளை இழந்திருந்தது. அப்போது ரகானே 25, விஹாரி 15 ரன்கள் எடுத்து அவுட்டாகாமல் களத்தில் இருந்தனர். இந்திய அணி 39 ரன்கள் நியூசிலாந்தை விட பின்தங்கிய நிலையில் இருந்தது.
இதைத்தொடர்ந்து நான்காவது நாள் ஆட்டத்தை இவர்கள் இருவரும் தொடர்ந்து ஆடினர். நிதான ஆட்டத்தை கடைபிடித்து வந்த ரகானே, 29 ரன்கள் எடுத்த நிலையில், போல்ட் வேகத்தில் விக்கெட் கீப்பர் வால்ட்லிங்கிடம் கேட்ச் கொடுத்து தொடக்கத்திலேயே பெவிலியன் திரும்பினார்.
இதன் பின்னர் அவரோடு சிறப்பாக பார்ட்னர்ஷிப் அமைத்து ஆடிய விஹாரி 15 ரன்களோடு, அடுத்த ஓவரிலேயே சவுத்தியின் வேகத்தில் கிளீன் போல்ட் ஆனார். ஆட்டம் தொடங்கிய சில நிமடங்களிலேயே அடுத்தடுத்து இரண்டு விக்கெட்டுகளை இழந்து இந்திய அணி தடுமாறியது.
விக்கெட் கீப்பர் ரிஷப் பண்ட் கொஞ்ச நேரம் தாக்குப்பிடித்து விளையாடி 25 ரன்கள் எடுத்தார். அவரும் சவுத்தி பந்தில் போல்ட்டிடம் கேட்ச் கொடுத்து அவுட்டானார்.
மற்ற வீரர்களான அஸ்வின் 4, இஷாந்த் 12, பும்ரா ரன் எதுவும் எடுக்காமல் ஆட்டமிழக்க இந்திய அணி 191 ரன்களுக்கு அனைத்து விக்கெட்டுகளையும் இழந்தது. நியூசிலாந்தை விட 8 ரன்கள் இந்திய அணி முன்னிலை பெற்றது.
இதனால் 9 ரன்கள் எடுத்தால் வெற்றி என்ற இலக்குடன் களமிறங்கிய நியூசிலாந்து, 1.4 ஓவரில் விக்கெட் இழப்பின்றி வெற்றிக்கான இலக்கை எட்டியது. இதன் மூலம் இரண்டுப் போட்டிகள் கொண்ட டெஸ்ட் தொடரில் 1-0 என நியூசிலாந்து முன்னிலை பெற்றது.
முதல் இன்னிங்ஸில் 5, இரண்டாவது இன்னிங்ஸில் 4 என மொத்தம் 9 விக்கெட்டுகளை வீழ்த்தி நியூசிலாந்து அணியின் வெற்றிக்குக் காரணமாக இருந்த வேகப்பந்து வீச்சாளர் சவுத்தி ஆட்டநாயகனாக தேர்வு செய்யப்பட்டார்.
ஸ்கோர் சுருக்கம்:
இந்தியா முதல் இன்னிங்ஸ் -165 (ரகானே - 46, சவுத்தி - 4/49)