கோவிட்-19 பெருந்தொற்று அச்சுறுத்தல் காரணமாக நாடு முழுவதும் மே 3ஆம் தேதி வரை, ஊரடங்கு உத்தரவு நீட்டிக்கப்படுவதாக மத்திய அரசு அறிவித்துள்ளது. இதனால் இம்மாதம் 15ஆம் தேதி, தொடங்குவதாக இருந்த ஐபிஎல் தொடரின் 13ஆவது சீசன் காலவரையின்றி ஒத்திவைக்கப்பட்டுள்ளது.
இதற்கிடையில் இந்திய அணியின் நட்சத்திர வீரராக வலம் வரும் கே.எல்.ராகுல், இன்று தனது 28ஆவது பிறந்தநாள் விழாவைத் தனது குடும்பத்தினருடன் சேர்ந்து கொண்டாடி வருகிறார். 2014ஆம் ஆண்டு ஆஸ்திரேலிய அணிக்கெதிரான டெஸ்ட் தொடரின் மூலம் சர்வதேச கிரிக்கெட்டிற்கு அறிமுகமான கே.எல். ராகுல், தனது அதிரடி பேட்டிங்கால் இன்று இந்திய அணியின் தவிர்க்க முடியாத வீரராக வலம் வந்து கொண்டிருக்கிறார்.
- இதுவரை இந்திய அணிக்காக 36 டெஸ்ட் போட்டிகளில் விளையாடியுள்ள ராகுல், ஐந்து சதங்கள், 11 அரை சதங்கள் என 2,006 ரன்களை குவித்துள்ளார்.
- இந்திய அணிக்காக 32 ஒருநாள் போட்டிகளில் நான்கு சதம், ஏழு அரை சதங்களை விளாசி 1,239 ரன்களை சேர்த்துள்ளார்.
- அதேபோல் 42 சர்வதேச டி20 போட்டிகளில் களமிறங்கியுள்ள ராகுல் இரண்டு சதங்கள், 11 அரை சதங்கள் என 1,127 ரன்களை விளாசியுள்ளார்.
- மேலும் இவர் தற்போது தொடக்க வீரர், இடைநிலை வீரர், ஃபினிஷர் என இந்திய அணியின் அனைத்து ரோல்களிலும் கலக்குவது மட்டுமில்லாமல், விக்கெட் கீப்பிங்கிலும் சிறப்பாக செயல்பட்டு வருவதால், இந்திய அணியின் நம்பிக்கை நட்சத்திரமாகவும் பார்க்கப்படுகிறார்.