தமிழ் திரைப்பட நடப்பு தயாரிப்பாளர்கள் சங்கத்தின் புதிய இணையதளம் தொடக்கம்...!

சென்னை: தமிழ் திரைப்பட நடப்பு தயாரிப்பாளர்கள் சங்கத்தின் புதிய இணையதளம் தொடங்கப்பட்டுள்ளது.

இயக்குநரும், தயாரிப்பாளருமான ‘இயக்குநர் இமயம்’ பாரதிராஜா ஆகஸ்ட் 3ஆம் தேதி “தமிழ் திரைப்பட நடப்பு தயாரிப்பாளர்கள் சங்கம்" தொடங்கினார். இந்த அமைப்புக்கு www.TFAPA.com எனும் பெயரில் இணையதளம் ஒன்று தொடங்கப்பட்டு இன்று (ஆகஸ்ட் 28) முதல் நடைமுறைக்கு வந்துள்ளது. இந்த தளத்தில் 1931ஆம் ஆண்டு முதல் தற்போது வரை வெளியான நேரடி தமிழ் திரைப்படங்களின் பெயர்கள், அதன் தயாரிப்பாளர்கள், நடித்த கலைஞர்கள், தொழில்நுட்ப கலைஞர்கள், படம் பற்றி இதர தகவல்களும் இடம் பெறுவதற்கான பணிகள் நடைபெற்று வருகின்றன.

தங்களின் திரைப்படத்திற்கு தலைப்புகளை பதிவு செய்ய தயாரிப்பாளர்கள், இந்த இணைய தளம் மூலம் நேரடியாக பதிவு செய்யும் வசதியை வெகு விரைவில் அறிமுகம் செய்ய இந்த புதிய சங்கம் ஏற்பாடு செய்து வருகிறது. இது குறித்து தமிழ் திரைப்பட நடப்பு தயாரிப்பாளர்கள் சங்கம் வெளியிட்டுள்ள செய்தி அறிக்கையில்,

"தமிழ்நாடு அரசு திரைப்பட படப்பிடிப்புகள் தொடங்குவதற்கான அனுமதியை விரைவில் கொடுக்கும் என்ற நம்பிக்கையில் சங்கம் உள்ளது. கரோனாவால் தடைபட்ட படப்பிடிப்புகளை மீண்டும் நடத்துவதற்கு தயாரிப்பாளர்களுக்கு தேவையான வழிகாட்டுதல் என பிற உதவிகளையும் திரைப்பட நடப்பு தயாரிப்பாளர்கள் சங்கம் மேற்கொள்ள இருக்கிறது. திரையரங்குகளில் டிக்கட் விற்பனையில் வசூலிக்கப்படும் 8 விழுக்காடு உள்ளூர் வரியை ரத்து செய்ய வேண்டும் என தமிழ்நாடு அரசிடம் முறையிட்டு இருக்கிறோம். வெகு விரைவில் அது நீக்கப்பட்டு, ஒரு நல்ல தீர்வு அரசிடம் இருந்து கிடைக்கும் என்ற நம்பிக்கையில் நாங்கள் உள்ளோம்.

தமிழ் திரைப்பட நடப்பு தயாரிப்பாளர்கள் சங்கம் தொடங்கப்பட்டு உறுப்பினர்கள் சேர்க்கை தொடங்கிய பின் இதுவரை 100 பேர் உறுப்பினர்களாக இணைந்துள்ளனர். இவற்றில் 50 பேர் வாக்குரிமை உள்ளவர்களும் மேலும் அசோசியேட், புரபசனல் தகுதி அடிப்படையில் 50 உறுப்பினர்களும் சேர்க்கப்பட்டுள்ளனர். இவர்களில் 45 ஆண்டுகளாக வெற்றிகரமான படங்களை தயாரித்த தயாரிப்பாளர்களும் உறுப்பினர்களாக இணைந்து உள்ளனர்.

தமிழ் திரைப்பட நடப்பு தயாரிப்பாளர்கள் சங்கத்துக்கு இன்றைய தொழில்நுட்ப வசதிகளுடன் கூடிய மேம்படுத்தப்பட்ட அலுவலகம் தயாராகி வருகிறது. இந்த அலுவலகம் தேர்ந்தெடுக்கப்பட்ட புதிய நிர்வாகிகள் தலைமையில் இயங்க உள்ளது. இதுவரை சங்கத்தில் உறுப்பினர்களாக இணைந்துள்ள முதன்மை உறுப்பினர்கள் 50 பேர் சங்கத்துகான புதிய நிர்வாக குழுவை தேர்ந்தெடுக்க உள்ளனர்.

தமிழ் திரைப்பட நடப்பு தயாரிப்பாளர்கள் சங்கத்தின் அனைத்து செயல்பாடுகளும் வெளிப்படை தன்மையுடன் இருக்கும். உறுப்பினர்கள் சேர்க்கைக்கான படிவங்களை www.tfapa.com இணைய தளத்தில் பதிவிறக்கம் செய்துகொள்ளலாம். மேலும் தமிழ் சினிமாவின் நடப்புகளையும், சங்கத்தின் அடுத்தக்கட்ட நடவடிக்கைகளை பற்றியும், இந்த இணைய தளத்தில் உடனுக்குடன் தெரிந்து கொள்ளலாம்.

சங்கத்தின் செயல்பாடுகளை இன்னும் கூடுதலாக்க, ஆக்கபூர்வமாக செயல்பட, உங்களின் மதிப்புமிக்க ஆலோசனைகளை எங்களது அதிகாரபூர்வ தளங்களின் வாயிலாக தெரிவிக்கலாம். எங்களது அன்றாட செயல்பாடுகளை அறிந்துகொள்ள பின் தொடரலாம்" எனக் குறிப்பிடப்பட்டுள்ளது.