’கண்ண தொறக்கணும் சாமி...’; 80'ஸ் எட்டாக்கனி ஊர்வசி பிறந்தநாள்!

முந்தானை முடிச்சு திரைப்படத்தின் இயக்குநர் கே. பாக்கியராஜ் உடன் நடித்து புகழ்பெற்ற நடிகை ஊர்வசி இன்று பிறந்த நாள் கொண்டாடுகிறார். அவருக்கு ரசிகர்கள் வாழ்த்து தெரிவித்து வருகின்றனர்.

தென்னிந்திய திரைப்படங்களுள் புகழ்பெற்ற நடிகை ஊர்வசி. இவருடைய இயற்பெயர் கவிதா ரஞ்சினி. ஊர்வசி என்ற மேடைப் பெயரின் மூலம் பரவலாக அறியப்படுகிறார். இவர் கேரளா மாநிலம் திருவனந்தபுரத்தில் பிறந்தவர். மலையாளம், தமிழ், தெலுங்கு, கன்னடம் உள்ளிட்ட தென்னிந்திய மொழிப் படங்களில் நடித்துள்ளார்.

ஊர்வசி மலையாள திரைப்படங்களில் பிரதானமாக நடித்து புகழடைந்தார். இவர் கே.பாக்கியராஜ் இயக்கிய 'முந்தானை முடிச்சு' திரைப்படத்தின் மூலமாக தமிழில் அறிமுகமாகி, தனக்கென தனி ரசிகர் பட்டாளத்தையே உருவாக்கினார். இத்திரைப்படத்தில் இடம் பெற்ற "கண்ண தொறக்கணும் சாமி" என்னும் பாடல் அந்த கால இளசுகளின் தூக்கம் கலைத்தது.

இவர் முதலில் மலையாள நடிகர் மனோஜ் கே.ஜெயன் என்பவரை திருமணம் செய்து கொண்டார். இந்தத் தம்பதிக்கு ஒரு பெண் குழந்தை உள்ளது. முதல் கணவருடனான ஏற்பட்ட கருத்து வேறுபாடு காரணமாக விவாகரத்து பெற்றார். பின்னர் கடந்த 2014ஆம் ஆண்டு தனது 47ஆம் வயதில் சிவ பிரசாத் என்பவரை திருமணம் செய்து கொண்டார்.

இந்நிலையில் இன்று (ஜன.25) தனது 53ஆவது பிறந்தநாளைக் கொண்டாடும் ஊர்வசிக்கு திரைத்துறையினர், ரசிகர்கள் உள்ளிட்டோர் வாழ்த்து தெரிவித்து வருகின்றனர்.

இதையும் படிங்க:மாலத்தீவில் கத்ரீனா கைஃப்!