காபுல்:ஆப்கானிஸ்தான் தலைநகர் காபுலில் உள்ள சீக்கிய வழிபாட்டு தலமான குருத்வாராவில் ஐஎஸ்ஐஎஸ் பயங்கரவாதிகள் இன்று (ஜூன் 18) காலை வெடிகுண்டு தாக்குதல் நடத்தியதாக கூறப்படுகிறது. இதில், பலர் உயிரிழந்திருக்கலாம் என தகவல் வெளியாகியுள்ளது.
தொடர் குண்டுவெடிப்பு சத்தம் கேட்டதாக குருத்வாராவிற்கு அருகில் இருக்கும் பகுதியைச் சேர்ந்தவர்கள் தெரிவித்தனர். இச்சம்பவம் குறித்து சமூக வலைதளங்களில் பல தகவல்கள் பரவி வரும் நிலையில், பாஜக நிர்வாகி மஜிந்தர் சிங் சிர்ஸா சம்பவம் தொடர்பான சில காணொலிகளை ட்விட்டரில் பகிர்ந்துள்ளார். தாக்குதல் சம்பவத்தில், சவிந்தர் சிங் என்பவர் உயிரிழந்திருப்பதாகவும் அவர் கூறியுள்ளார்.
இதுகுறித்து, இந்திய வெளியுறவுத்துறை செயலாளர் அரிந்தம் பக்சி,"காபுலில் உள்ள குருத்வாரா மீது தாக்குதல் நடந்ததாக வரும் தகவல்கள் மிகவும் கவலை அளிக்கிறது; அங்கு நிலவும் சூழலை கண்காணித்து வருகிறோம்" என்று ட்விட்டர் பக்கத்தில் பதிவிட்டுள்ளார்.