எலான் மஸ்க்கிற்குச் சொந்தமான ஸ்பேஸ்எக்ஸ் நிறுவனத்தில் தயாரிக்கப்பட்ட செவ்வாய்க்குச் செல்லும் ஸ்டார்ஷிப் ராக்கெட் ரகங்கள் சோதனையிடப்பட்டுவருகின்றன. முன்மாதிரி ஹெவி-லிப்ட் ராக்கெட் வகைகளான எஸ்என் 8, எஸ்என் 9, எஸ்என் 10 விண்கலன்களை தனது கனவுத் திட்டத்திற்காக அவர் உருவாக்கினார். அதில் முதல் இரண்டு விண்கலன்கள் சோதனை முயற்சியின்போது வெடித்துச் சிதறின.
இந்நிலையில், நேற்று (மார்ச் 3) மூன்றாவதாக உருவாக்கப்பட்ட எஸ்என்10 விண்கலம் டெக்சாஸில் உள்ள போகா சிக்கா ராக்கெட் ஏவுதளத்தில் சோதனையிடப்பட்டது. இந்தச் சோதனையில் எஸ்என்10 விண்கலம் வெற்றிகரமாக ஏவப்பட்ட பின், தரையிறக்கப்பட்டது.