உத்தரகாசி: உத்தரகாண்ட மாநிலம், உத்தரகாசி மாவட்டத்தில் உள்ள பிரம்மகால் - யமுனோத்திரி நெடுஞ்சாலையில் மலையைக் குடைந்து சுரங்கம் அமைக்கும் பணியானது நடைபெற்று வந்தது. இந்நிலையில், கடந்த நவம்பர் 12ஆம் தேதி, அந்த சுரங்கத்தில் தீடீரென விபத்து ஏற்பட்டது. அந்த விபத்தின்போது, பணியில் ஈடுபட்டிருந்த சுமார் 41 தொழிலாளர்கள் சுரங்கத்திற்குள் சிக்கிக் கொண்டனர்.
அதனைத் தொடர்ந்து தற்போது வரை, பல தடங்கல்களைக் கடந்து மீட்புப் பணியானது தீவிராமாக நடந்து வருகிறது. மேலும், இந்த நிமிடம் வரை சுரங்கத்தில் சுக்கியுள்ள தொழிலாளர்களுக்குத் தேவையான ஆக்சிஜன் மற்றும் உணவு ஆகியவை மீட்புப் படையால் 6 அங்குல பைப் மூலம் அனுப்பப்படுகிறது. மேலும், தொழிலாளர்கள் மீட்கப்படவும், அவர்களைக் கொண்டு செல்வதற்காக 41 ஆம்புலன்ஸ்களும், தேவைப்பட்டால் அவர்களைக் கொண்டு செல்ல ஹெலிகாப்டரும் தயார் நிலையில் உள்ளது.
சுரங்க விபத்தில் 41 தொழிலாளர்களும் சிக்கி, தற்போது 12 நாட்கள் ஆன நிலையில், நேற்று (நவ.22) சுரங்கத்தில் செங்குத்தாக துளையிட்டு மீட்பதற்கான இடம் கண்டறியப்பட்டு, துளையிட்டு மீட்பதற்கான பணிகள் தீவிரம் அடைந்தது. இறுதிகட்ட மீட்புப் பணி கிட்டத்தட்ட நெருங்கிய நிலையில், துளையிடும் எந்திரத்தின் பிளேடுகள் சேதமடைந்தது. பின்னர் துளையிடும் ஆகர் எந்திரத்தின் பிளேடுகளை மாற்றும் பணியால் மீட்புப் பணியில் தாமதம் ஏற்பட்டது. அதனைத் தொடர்ந்து, மீட்புப்பணி துவங்கப்பட்டது. தொழிலாளர்கள் விரைவில் மீட்கப்படுவார்கள் எனவும் எதிர்பார்க்கப்படுகிறது.
இது குறித்து தேசிய பேரிடர் மீட்புப் படையின் (NDRF) இயக்குநர் அதுல் கர்வால் கூறியதாவது, "சுரங்கத்தில் சிக்கியுள்ள தொழிலாளர்கள் விரைவில் மீட்கப்படுவார்கள் என நம்பிக்கை உள்ளது. அவர்கள் வெளியே வந்ததும் சிகிச்சை அளிப்பதற்காக எங்களது குழு தயாராக உள்ளது. இந்த நாள் இறுதிக்குள் மீட்புப்பணி நிச்சயம் நிறைவடையும்" என தெரிவித்துள்ளார்.