டெல்லி அடுக்குமாடி குடியிருப்பில் தீவிபத்து - 6 பேர் உயிரிழப்பு!

டெல்லியில் அடுக்குமாடி குடியிருப்பில் ஏற்பட்ட தீ விபத்தில் 6 பேர் உயிரிழந்தனர்.

டெல்லி : வடமேற்கு டெல்லியின் பிரதம்பூரா பகுதியில் உள்ள வீட்டில் ஏற்பட்ட தீ விபத்தில் 6 பேர் பரிதாபமாக உயிரிழந்தனர். பிதம்பூரா பகுதியில் உள்ள அடுக்குமாடி குடியிருப்பின் முதல் தளத்தில் தீ விபத்து ஏற்பட்டதாக தீயணைப்பு வீரர்களுக்கு தகவல் கிடைத்து உள்ளது. இதையடுத்து சம்பவ இடத்திற்கு விரைந்த போலீசார் தீயணைப்பு பணியில் ஈடுபட்டனர்.

வீட்டில் சிக்கி இருந்த 7 பேர் மீட்கப்பட்ட நிலையில், அவர்களை அருகில் இருந்த மருத்துவமனையில் போலீசார் அனுமதித்தனர். இதில் சிகிச்சை பலனின்றி 6 பேர் உயிரிழந்ததாக தெரிவிக்கப்பட்டு உள்ளது. உயிரிழந்தவர்கள் 4 பெண்கள் உள்பட 6 பேர் என போலீசார் தெரிவித்து உள்ளனர். குடியிருப்பில் தீ பற்றியதற்கான காரணம் தெரியவராத நிலையில் எப்படி தீ பற்றியது என்பது குறித்து விசாரித்து வருவதாக போலீசார் தெரிவித்து உள்ளனர்.

முதல் மாடியில் தீ பற்றிய நிலையில், அங்கிருந்து வெளியேறிய கரும்புகை அடுத்தடுத்து இரண்டு மற்றும் மூன்றாவது தளத்திற்கு எழும்பியது. இதனால் அங்கு தங்கி இருந்தவர்கள் மூச்சு திணறலுக்கு ஆளானதாக தெரிவிக்கப்பட்டு உள்ளது. இதையடுத்து புகையை கட்டுப்படுத்தும் பணியில் தீயணைப்பு வீரர்கள் ஈடுபட்டனர்.

இந்த தீ விபத்தில் உயிரிழந்தவர்கள் 25 முதல் 60க்கு உட்பட்டவர்கள் என கண்டறியப்பட்டு உள்ளதாகவும் அவர்களை அடையாளம் காணும் பணியில் ஈடுபட்டு உள்ளதாகவும் போலீசார் தெரிவித்து உள்ளனர். தீ விபத்துக்கான காரணம் குறித்து டெல்லி போலீசார் வழக்குப்பதிவு செய்து விசாரணை நடத்தி வருகின்றனர்.

இதையும் படிங்க :குஜராத் படகு விபத்து : 18 பேர் மீது வழக்குப்பதிவு! விபத்துக்கான காரணம் என்ன?