லடாக்: இந்தியா மற்றும் பாகிஸ்தான் இடையே கடந்த 1999ஆம் ஆண்டு நடந்த கார்கில் போரில் இந்தியா வெற்றி பெற்றது. இந்த போரில் 500க்கும் மேற்பட்ட இந்திய ராணுவ வீரர்கள் உயிர்த்தியாகம் செய்தனர். கார்கில் போர் வெற்றியைக் கொண்டாடும் வகையிலும், போரில் உயிர்த்தியாகம் செய்த ராணுவ வீரர்களை நினைவு கூர்ந்து அவர்களுக்கு மரியாதை செலுத்தும் வகையிலும் ஆண்டுதோறும் ஜூலை 26ஆம் தேதி கார்கில் வெற்றி தினம் கொண்டாடப்படுகிறது.
அந்த வகையில், 24வது கார்கில் வெற்றி தினம் இன்று (ஜூலை 26) கொண்டாடப்படுகிறது. இந்த நிலையில், கார்கில் வெற்றி தினம் தொடர்பாக ட்விட்டரில் பதிவிட்டுள்ள பிரதமர் மோடி, "கார்கில் வெற்றி தினம், இந்தியாவின் துணிச்சலான ராணுவ வீரர்களின் வீரம் நிறைந்த கதையை எடுத்துக் கூறுகிறது. அவர்கள் எப்போதும் மக்களுக்கு உத்வேகம் அளிப்பார்கள். இந்த நாளில், அவர்களுக்கு தலைவணங்கி மரியாதை செலுத்துகிறேன்" என குறிப்பிட்டுள்ளார்.
கார்கில் வெற்றி தினத்தையொட்டி, லடாக்கின் திராஸ் பகுதியில் அமைந்துள்ள கார்கில் போர் நினைவிடத்தில் பாதுகாப்புத்துறை அமைச்சர் ராஜ்நாத் சிங் மலர் வளையம் வைத்து மரியாதை செலுத்தினார். அதேபோல், ராணுவத் தலைமை தளபதி மனோஜ் பாண்டேவும், கார்கில் போர் நினைவிடத்தில் மலர் வளையம் வைத்து வீர மரணமடைந்த ராணுவ வீரர்களுக்கு மரியாதை செலுத்தினார்.
அவரைத் தொடர்ந்து கடற்படைத் தளபதி ஹரிகுமார், விமானப்படை தளபதி விஆர் சவுத்ரி ஆகியோர் மரியாதை செலுத்தினர். பின்னர், ஏராளமான ராணுவ அதிகாரிகள் மற்றும் ராணுவ வீரர்களும் கார்கில் போரில் மறைந்த ராணுவ வீரர்களுக்கு மரியாதை செலுத்தினர்.