தூத்துக்குடி:நாடு முழுவதும் அனைத்து மத்திய தொழிற்சங்கங்கள் சார்பில், பல்வேறு கோரிக்கைகளை வலியுறுத்தி, இன்று (பிப்.16) வேலை நிறுத்தப் போராட்டம் நடைபெற்று வருகிறது. அந்த வகையில், தூத்துக்குடியில் அனைத்து தொழிற்சங்கங்கள் கூட்டமைப்பு சார்பில், வ.உ.சி துறைமுக தொழிலாளர்கள் வேலை நிறுத்தப் போராட்டத்தில் ஈடுபட்டனர்.
அப்போது, மத்திய அரசு, துறைமுகங்களை தனியார்மயப்படுத்துவதை கண்டித்தும், தனியார் நிறுவனங்களுக்கு விற்பனை செய்வதைக் கண்டித்தும், துறைமுக ஊழியர்களுக்கு வழங்க வேண்டிய ஊதிய ஒப்பந்தம், போனஸ் உள்பட பண பலன்களை வழங்காமல் காலம் தாழ்த்தி வருவதைக் கண்டித்தும், துறைமுகத்தில் உள்ள ஆயிரக்கணக்கான காலிப் பணியிடங்களை நிரப்ப நடவடிக்கை எடுக்க வேண்டும் உள்ளிட்ட கோரிக்கைகளை வலியுறுத்தி, வேலை நிறுத்தப் போராட்டத்தில் ஈடுபட்டுள்ளனர்.