சென்னை: தமிழ்நாட்டில் மாநில பாடத்திட்டத்தின் கீழ் படித்த மாணவர்களுக்கான 12ஆம் வகுப்பு பொதுத்தேர்வு கடந்த மார்ச் 1ஆம் தேதி முதல் 22ஆம் தேதி வரை நடைபெற்றது. சுமார் 3.302 மையங்களில் நடத்தப்பட்ட இந்த பொதுத்தேர்வில் தமிழ்நாடு மற்றும் புதுச்சேரியில் உள்ள 7 ஆயிரத்து 534 பள்ளிகளில் படித்த 7 லட்சத்து 80 ஆயிரத்து 550 மாணவர்கள், தனித்தேர்வர்கள் 8 ஆயிரத்து 190 மாணவர்கள் என மொத்தம் 7 லட்சத்து 80 ஆயிரம் மாணவர்கள் தேர்வு எழுதி உள்ளனர்.
இதனைத் தொடர்ந்து, இந்த பொதுத்தேர்வின் விடைத்தாள்கள் திருத்தும் பணிகள் 86 மையங்களில் ஏப்ரல் 1ஆம் தேதி முதல் 13ஆம் தேதி வரை நடைபெற்று முடிவடைந்த நிலையில், வரும் மே 6ஆம் தேதி தேர்வு முடிவுகள் வெளியிடுவதற்கு அரசு தேர்வுத்துறை தயாராக உள்ளது.
இந்த பொதுத்தேர்வு முடிவுகளை மாணவர்கள் www.tnresults.nic.in, www.dge.tn.gov.in என்ற இணையதள முகவரி மூலம் தெரிந்து கொள்ள ஏற்பாடு செய்யப்பட்டுள்ளது. அதேபோல், தேர்விற்கான விண்ணப்பத்தில் அளித்த தொலைபேசி எண்ணிற்கு எஸ்எம்எஸ் அனுப்பவும் ஏற்பாடு செய்யப்பட்டுள்ளது.