சென்னை: ராமேஸ்வரம் மீன்பிடி துறைமுகத்திலிருந்து கடந்த மாதம் 21ஆம் தேதி மீன்பிடிப்பதற்கான அனுமதிச் சீட்டு பெற்று கடலுக்கு மீன் பிடிக்கச் சென்று நெடுந்தீவு அருகே மீன்பிடித்துக் கொண்டு இருந்த மூன்று விசைப்படகையும் அதிலிருந்த 25 மீனவர்களை இலங்கை கடற்படையினர் எல்லை தாண்டி மீன்பிடித்ததாகக் குற்றச்சாட்டை முன்வைத்து கைது செய்தனர்.
இதன் தொடர்ச்சியாக, அவர்களைச் சிறையில் அடைத்து, விசாரணை மேற்கொண்டனர். அதனை அடுத்து, இலங்கை கடற்படையினரால் கைது செய்யப்பட்ட, 25 ராமேஸ்வரம் மீனவர்களும், இலங்கை ஊர்க் காவல்துறை நீதிமன்றத்தில் ஆஜர்படுத்தப்பட்டனர்.
இந்த நிலையில், பிடிபட்ட 25 ராமேஸ்வரம் மீனவர்களையும் ஏப்ரல் மாதம் 4ஆம் தேதி வரை, அதாவது இன்று வரை சிறையில் அடைக்க ஊர்க்காவல்துறை நீதிமன்ற நீதிபதி உத்தரவிட்டார். அதனைத் தொடர்ந்து, அவர்கள் 25 பேரும் யாழ்ப்பாணம் சிறையில் அடைக்கப்பட்டனர்.