கோயம்புத்தூர்: பொள்ளாச்சி அடுத்த ஆழியார் அணையில் இருந்து, ஒப்பந்தப்படி வருடம்தோறும் கேரள மாநிலத்திற்கு தண்ணீர் திறந்து விடப்படுகிறது. அவ்வாறு திறக்கப்படும் தண்ணீர், ஆனைமலை அம்பராம்பாளையம் வழியாக கேரள மாநிலத்திற்குச் சென்றடைகிறது.
பல்லாயிரக்கணக்கான விவசாய நிலங்களையும், பொள்ளாச்சி, கிணத்துக்கடவு, குறிச்சி, குனியமுத்தூர் பொதுமக்களின் குடிநீர் தேவைகளையும் பூர்த்தி செய்யும் ஆனைமலை ஆற்றில், கழிவுநீர் நேரடியாக கலந்து நீர் மாசடைகிறது. இதனால், ஆனைமலை ஆறு முழுவதும் ஆகாயத்தாமரை பரவி தண்ணீர் மாசடைந்து வருகிறது.
இந்நிலையில், இதற்கு தீர்வு ஏற்படுத்தக் கோரி, வேட்டைக்காரன் பகுதியைச் சேர்ந்த சமூக ஆர்வலர் காந்தி பூபதி என்பவர், பொள்ளாச்சி சார் ஆட்சியர் அலுவலகத்திற்கு, மாசடைந்த ஆனைமலை ஆற்று தண்ணீரை பாட்டிலில் பிடித்து, இலை தலை செடிகளை உடல் முழுவதும் கட்டிக்கொண்டு வந்து மனு அளித்துள்ளார். இந்த மனுவைப் பெற்றுக் கொண்ட அதிகாரிகள், இது குறித்து உரிய நடவடிக்கை எடுக்கப்படும் என தெரிவித்தனர்.