கரூர்: கரூர் மாநகராட்சி அலுவலகத்தில் உள்ள கூட்டரங்கில், நேற்று (திங்கட்கிழமை) காலை 10 மணிக்கு மாநகராட்சி மேயர் கவிதா கணேசன் தலைமையில் மாநகராட்சி அவசர கூட்டம் நடைபெற்றது. இதில், மாநகராட்சி அதிகாரிகள், மண்டல குழுத் தலைவர்கள், மாநகராட்சி உறுப்பினர்கள் என பலர் கலந்து கொண்டனர். இந்த கூட்டத்தில், மொத்தம் 27 தீர்மானங்கள் நிறைவேற்றப்பட்டன.
அதில் 27வது தீர்மானமாக, கரூர் மாநகராட்சி கட்டுப்பாட்டில் உள்ள 382 வாடகையை கடைகளுள், ஏலம் எடுக்கப்பட்ட 104 கடைகளில், கண்டறிய இயலாத இனங்கள் மற்றும் ஆறு இரட்டை வரி விதிப்பு, மற்றும் தொகை இல்லாத 117 இனங்கள் என 227 கடைகளை கணினியில் இருந்து நீக்கம் செய்யப்படுவதற்கு, 1 கோடியே 27 லட்சத்து 71 ஆயிரத்து 577 ரூபாய் கேட்பு தொகையை வசூல் செய்ய விலக்கு அளிக்க மற்றும் கள ஆய்வு செய்து கணினியில் இருந்து நீக்கம் செய்திட மாமன்றத்தின் ஒப்புதல் பெறுவதற்கான தீர்மானம் முன்வைக்கப்பட்டது.
இதற்கு, காங்கிரஸ் கட்சியின் மாமன்ற உறுப்பினர் ஸ்டீபன் பாபு மற்றும் சிபிஎம் மாமன்ற உறுப்பினர் தண்டபாணி ஆகியோர் எதிர்ப்பு தெரிவித்தனர். மேலும், இரண்டு ஆண்டுகளுக்கு முன்பு பேருந்து நிலையத்தில் 24 கடைகள் மட்டும் இடிக்கபட்டதால், மீதமுள்ள கடைகளுக்கு உரிமைதாரர் அல்லது அவர்களின் வாரிசுதாரர்களைக் கண்டறிந்து கேட்புத் தொகையை வசூல் செய்ய வேண்டும் எனக் கூறினர்.