மாஸ்கோ : உக்ரைன் நாட்டின் 65 கைதிகள் உள்பட 74 பேருடன் ரஷ்ய போக்குவரத்து விமானம் விபத்துக்குள்ளானது. இந்த விபத்தில் சிக்கியர்வகள் குறித்த எந்த தகவலும் முதலில் வெளியிடாத நிலையில், தற்போது விபத்தில் சிக்கிய அனைவரும் உயிரிழந்ததாக தெரிவிக்கப்பட்டு உள்ளது.
உக்ரைன் நேட்டோ அமைப்பில் சேர்வதற்கு எதிர்ப்பு தெரிவித்த ரஷ்யா, கடந்த 2022ஆம் ஆண்டு பிப்ரவரி மாதம் 24ஆம் தேதி ராணுவ நடவடிக்கையை அறிவித்தது. ஏறத்தாழ இரண்டு ஆண்டுகளை போர் நெருங்கிய நிலையில், இரு தரப்பிலும் கடும் சேத விளைவுகள் ஏற்பட்டு உள்ளன.
போரில் இரு நாட்டைச் சேர்ந்த ஆயிரக்கணக்கான மக்கள், ராணுவ வீரர்கள் கொல்லப்பட்டனர். தொடக்கத்தில் போரில் உக்ரைன் சற்று பின் தங்கியிருந்தாலும் அமெரிக்கா மற்றும் ஐரோப்பிய நாடுகளின் உதவியுடன் தற்போது வரை தாக்குப்பிடித்து பதிலடி கொடுத்து வருகிறது. இந்த போரால் உலகளவில் பெரும் பொருளாதார இழப்புகள் ஏற்பட்டு உள்ளது. இருப்பினும் போர் நிறுத்த பேச்சுவார்த்தையில் ஈடுபட இரண்டு நாடுகளும் முரண்டு பிடித்து வருகின்றனர்.
இதனால் லட்சக்கணக்கான மக்கள் சொந்த நாட்டில் இருந்து வெளியேறி அண்டை நாடுகளில் அகதிகளாக தஞ்சம் அடைந்து உள்ளனர். இந்நிலையில், உக்ரைன் போர்க் கைதிகள் 65 பேர் உள்பட 74 பேரை ஏற்றிக் கொண்டு சென்ற ரஷ்ய போக்குவரத்து விமானம் விபத்துக்குள்ளானதாக தெரிவிக்கப்பட்டு உள்ளது.