பெங்களூரு :கர்நாடகா மாநிலம் ஒயிட் பீல்ட் சாலையில் உள்ள ராமேஸ்வரம் கபேயில் கடந்த வெள்ளிக்கிழமை ஏற்பட்ட வெடிகுண்டு தாக்குதல் சம்பவத்தில் கடை ஊழியர்கள், வாடிக்கையாளர்கள் என ஏறத்தாழ 10 பேர் படுகாயம் அடைந்தனர். இந்த சம்பவம் தொடர்பாக பயங்கரவாத தடுப்பு சட்டமான உபாவின் கீழ் வழக்கு பதிவு செய்து பெங்களூரு குற்றப்பிரிவு போலீசார் விசாரணை நடத்தி வருகின்றனர்.
மேலும், இந்த சம்பவம் தொடர்பாக 8 தனிப் படை போலீசார் விசாரணை நடத்தி வருவதாக தெரிவிக்கப்பட்டது. மேலும் கடந்த வெள்ளிக்கிழமை இரவு மர்ம நபர் ஒருவரை போலீசார் பிடித்து விசாரித்து வருவதாக தகவல் பரவிய நிலையில், அதை போலீசார் உறுதிபடுத்த மறுத்துவிட்டனர். மேலும், சம்பவ இடத்தில் உள்ள சிசிடிவி காட்சிகளை ஆய்வு செய்த போலீசார் சந்தேகத்திற்கு இடமாக சுற்றித் திரிந்த நபர் குறித்த அடையாளங்களை வெளியிட்டனர்.