ਰੂਪਨਗਰ: ਦੇਸ਼ ਨੂੰ ਆਜ਼ਾਦ ਹੋਇਆਂ 75 ਸਾਲ ਤੋਂ ਵੱਧ ਦਾ ਸਮਾਂ ਹੋ ਗਿਆ ਹੈ, ਭਾਵੇਂ ਕੋਈ ਵੀ ਸਿਆਸੀ ਪਾਰਟੀ ਸੱਤਾ ਵਿੱਚ ਹੋਵੇ, ਦੇਸ਼ ਦੇ ਵਿਕਾਸ ਦੇ ਵੱਡੇ-ਵੱਡੇ ਦਾਅਵੇ ਕੀਤੇ ਜਾਂਦੇ ਰਹੇ ਹਨ ਪਰ ਅੱਜ ਵੀ ਕਈ ਅਜਿਹੇ ਪਿੰਡ ਹਨ ਜੋ ਬੁਨਿਆਦੀ ਸਹੂਲਤਾਂ ਤੋਂ ਕੋਹਾਂ ਦੂਰ ਹਨ। ਅਸੀਂ ਗੱਲ ਕਰ ਰਹੇ ਹਾਂ ਸਤਲੁਜ ਦਰਿਆ 'ਤੇ ਬਣੇ ਪਿੰਡ ਅਜੌਲੀ ਤੋਂ ਬੇਲਾਧਿਆਣੀ ਨੂੰ ਜੋੜਨ ਵਾਲੇ ਲੱਕੜ ਅਤੇ ਲੋਹੇ ਦੀਆਂ ਰੱਸੀਆਂ ਨਾਲ ਬਣੇ ਪੁਲ ਦੀ। ਪਿੰਡ ਵਾਸੀਆਂ ਨੇ 20 ਸਾਲ ਪਹਿਲਾਂ ਆਪਣੇ ਪੱਧਰ 'ਤੇ ਇਸ ਪੁਲ ਦਾ ਨਿਰਮਾਣ ਕਰਵਾ ਕੇ ਦੋ ਦਰਜਨਾਂ ਤੋਂ ਵੀ ਵੱਧ ਪਿੰਡਾਂ ਨੂੰ ਫਾਇਦਾ ਪਹੁੰਚਾਇਆ ਸੀ ਕਿਉਂਕਿ ਬੇਲਾਧਿਆਣੀ ਪਿੰਡ ਦੇ ਪਾਸੇ ਤੋਂ ਅਜੌਲੀ ਅਤੇ ਅਜੌਲੀ ਤੋਂ ਬੇਲਾ ਧਿਆਨੀ ਤੱਕ ਲੋਕਾਂ ਦੇ ਆਉਣ-ਜਾਣ ਦਾ ਰਸਤਾ ਬਹੁਤ ਛੋਟਾ ਹੈ, ਜਿਸ ਨਾਲ ਸਮੇਂ ਅਤੇ ਪੈਸੇ ਦੀ ਬੱਚਤ ਹੁੰਦੀ ਹੈ।
ਲੱਕੜ ਅਤੇ ਲੋਹੇ ਦੀਆਂ ਰੱਸੀਆਂ ਨਾਲ ਬਣਿਆ ਸੀ ਪੁਲ: ਪਿੰਡ ਅਜੌਲੀ ਤੋਂ ਬੇਲਧਿਆਣੀ ਨੂੰ ਜੋੜਨ ਵਾਲੇ ਲੱਕੜ ਅਤੇ ਲੋਹੇ ਦੀਆਂ ਰੱਸੀਆਂ ਨਾਲ ਬਣੇ ਪੁਲ ਹੁਣ ਇਸ ਪੁਲ ਦੀ ਇੱਕ ਰੱਸੀ ਟੁੱਟਣ ਤੋਂ ਬਾਅਦ ਇਸ ਪੁਲ ਨੂੰ ਬੰਦ ਕਰ ਦਿੱਤਾ ਗਿਆ ਹੈ, ਜਿਸ ਕਾਰਨ ਲੋਕਾਂ ਦੀਆਂ ਮੁਸ਼ਕਿਲਾਂ ਵਧ ਗਈਆਂ ਹਨ। ਜੇਕਰ ਲੋਕਾਂ ਨੇ ਅਜੌਲੀ ਤੋਂ ਬੇਲਧਿਆਣ ਜਾਂ ਉਥੋਂ ਆਉਣਾ ਜਾਣਾ ਹੈ ਤਾਂ ਉਨ੍ਹਾਂ ਨੂੰ ਲੰਬਾ ਸਫ਼ਰ ਤੈਅ ਕਰਨਾ ਪਵੇਗਾ ਅਤੇ ਸਕੂਲੀ ਬੱਚਿਆਂ ਨੂੰ ਸਭ ਤੋਂ ਵੱਧ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਕਿਉਂਕਿ ਉਨ੍ਹਾਂ ਦੇ ਫਾਈਨਲ ਪੇਪਰ ਚੱਲ ਰਹੇ ਹੈ। ਲੋਕਾਂ ਨੇ ਇਸ ਜਗ੍ਹਾ 'ਤੇ ਪੱਕਾ ਪੁਲ ਬਣਾਉਣ ਦੀ ਮੰਗ ਕੀਤੀ ਹੈ ਤਾਂ ਜੋ ਇਸ ਸਮੱਸਿਆ ਨੂੰ ਹਮੇਸ਼ਾ ਲਈ ਦੂਰ ਕੀਤਾ ਜਾ ਸਕੇ।