ସୁବର୍ଣ୍ଣପୁର: ପଶ୍ଚିମ ଓଡିଶାର ଗଣପର୍ବ ନୂଆଖାଇରେ ପ୍ରକୃତି ଓ ମଣିଷର ସଂପର୍କ ଏକ ସ୍ବତନ୍ତ୍ର ସ୍ଥାନ ଅଧିକାର କରିଛି । ବିଶେଷକରି ଏହି ପର୍ବରେ ବ୍ୟବହାର ହେଉଥିବା ପତ୍ରରେ ଚାଷୀ ନିଜ ଉତ୍ପାଦିତ ବର୍ଷର ପହିଲି ଶସ୍ୟକୁ ଇଷ୍ଟ ଦେବଦେବୀଙ୍କ ପାଖରେ ସମର୍ପଣ କରିଥାଏ । ଜୀବନ ଯାପନ ଠାରୁ ଆରମ୍ଭ କରି ପୂଜାବିଧି ପର୍ବପର୍ବାଣୀରେ ମଣିଷ ପ୍ରକୃତିକୁ କେତେ ଆପଣାର କରିଛି ତାହା ଏଇ ନୂଆଖାଇରୁ ହିଁ ଜଣାପଡେ। ବିଭିନ୍ନ ସଂପ୍ରଦାୟର ଲୋକେ ଏହି ପର୍ବରେ ଭିନ୍ନ ଭିନ୍ନ ପତ୍ର ବ୍ୟବହାର କରିଥାନ୍ତି ।
ବହୁ ବର୍ଷ ପୂର୍ବରୁ ସୋନପୁର ଗଡଜାତର ଲୋକେ ଆନନ୍ଦ ଉତ୍ସାହର ସହିତ ନୂଆଖାଇ ପର୍ବକୁ ପାଳନ କରିଆସୁଛନ୍ତି । ଆଉ ଏହି ପର୍ବର ବିଶେଷତ୍ବ ହେଲା ନୂଆଁଖାଇରେ ବ୍ୟବହାର ହେଉଥିବା ବିଭିନ୍ନ ପ୍ରକାରର ପତ୍ର । ଚାଷୀ ଉତ୍ପାଦିତ ଶସ୍ୟକୁ ପୂଜା ବିଧି କରି ଆଣିବା ପରେ ଗୃହିଣୀମାନେ ନବାର୍ଣ୍ଣ ପ୍ରସ୍ତୁତ କରି ନିଜ ଇଷ୍ଟଦେବୀଙ୍କ ପାଖରେ ସମର୍ପଣ କରିବା ପାଇଁ ପତ୍ର ସଂଗ୍ରହ କରିଥାନ୍ତି । ବୃକ୍ଷ ଉପାସନା କରି ସଂଗୃହୀତ ପତ୍ରରେ ବର୍ଷର ପହିଲି ଶସ୍ୟକୁ ଇଷ୍ଟଦେବୀଙ୍କ ପାଖରେ ଅର୍ପଣ କରି ସାରା ପରିବାର ସହିତ ନବାର୍ଣ୍ଣ ଭକ୍ଷଣ କରିଥାନ୍ତି ।