ଖୋର୍ଦ୍ଧା: ବୋଲଗଡ଼ ବ୍ଲକ ଉପାଧ୍ୟକ୍ଷଙ୍କ ନାଁରେ ସାଙ୍ଘାତିକ ଅଭିଯୋଗ ଆଣିଲେ ପ୍ରଧାନମନ୍ତ୍ରୀ ଆବାସ ଆଶାୟୀ ହିତାଧିକାରୀ । ପ୍ରଧାନମନ୍ତ୍ରୀ ଆବାସ କରାଇଦେବା ନାଁରେ ଉପାଧ୍ୟକ୍ଷ ଟଙ୍କା ନେଇଥିବା ଜିଲ୍ଲାପାଳଙ୍କୁ ଅଭିଯୋଗ କଲେ ହିତାଧିକାରୀ । ଏଭଳି ଅଭିଯୋଗ ଆସିଛି ଖୋର୍ଦ୍ଧା ଜିଲା ବୋଲଗଡ଼ ଗୋପାଳପୁର ପଞ୍ଚାୟତରୁ ।
ସୂଚନା ଅନୁଯାୟୀ ପଞ୍ଚାୟତର ରଞ୍ଜିତ ପାଇକରାୟଙ୍କ ନାମରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର କରାଇ ଦେବେ କହି ବୋଲଗଡ଼ ବ୍ଲକ ଉପାଧ୍ୟକ୍ଷ ସାଢ଼େ ଚାରି ହଜାର ଟଙ୍କା ନେଇଥିବା ଆଜି(ଗୁରୁବାର) ରଞ୍ଜିତ ଜିଲ୍ଲାପାଳଙ୍କୁ ଅଭିଯୋଗ କରିଛନ୍ତି । ସେହିଭଳି ଖାଲି ରଞ୍ଜିତ ନୁହନ୍ତି ତାଙ୍କ ଭଳି ଅନେକ ଲୋକଙ୍କ ଠାରୁ ଘର ପାଇଁ ଟଙ୍କା ନେଉଥିବା କହିଛନ୍ତି ଗ୍ରାମବାସୀ । ସେପଟେ ବୋଲଗଡ଼ ବ୍ଲକ ଉପାଧ୍ୟକ୍ଷ ଘଟଣାକୁ ଖଣ୍ଡନ କରିବା ସହ ଏହା ରାଜନୈତିକ ଉଦ୍ଦେଶ୍ୟ ରଖି ତାଙ୍କୁ ବଦନାମ କରିବା ପାଇଁ ଅପଚେଷ୍ଟା କରାଯାଉଛି କହିବା ସହ ଏହା ବିରୁଦ୍ଧରେ ଆଇନର ଆଶ୍ରୟ ନେବାକୁ କହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
