ବରଗଡ : ଜିଲ୍ଲାରେ ଧାନ ବିକ୍ରି ସମସ୍ୟା ଯେଭଳି ବଢି ଚାଲିଛି ଏହାର ପ୍ରତିବାଦରେ ଜିଲ୍ଲାର ବିଭିନ୍ନ ପ୍ରାନ୍ତରେ ଚାଷୀଙ୍କ ଆନ୍ଦୋଳନ ମଧ୍ୟ ସେଭଳି ତେଜି ଉଠୁଛି । ଆଜି ବରଗଡ଼ ଜିଲା ଗୋଡ଼ଭଗା କ୍ୟାମ୍ପ ଛକ ଠାରେ କୋଶଳ ସେନା ମଧ୍ୟ ଆନ୍ଦୋଳନକୁ ଓହ୍ଲାଇଛି । ବରଗଡ ସମ୍ବଲପୁର ୫୩ ନମ୍ବର ଜାତୀୟ ରାଜପଥକୁ କୋଶଳ ସେନା ଅବରୋଧ କରି ଆନ୍ଦୋଳନ ଜାରି ରଖିଥିବାବେଳେ ରାସ୍ତାର ଉଭୟ ପାର୍ଶ୍ଵରେ ବହୁ ସଂଖ୍ୟାରେ ଯାନବାହନ ଅଟକି ରହିଛି ।
ଓଡିଶାର ଭାତହାଣ୍ଡି କୁହାଯାଉଥିବା ବରଗଡ ଜିଲ୍ଲାର ଚାଷୀ ନିଜର ବହୁ କଷ୍ଟ ଅର୍ଜିତ ଧାନ ବିକ୍ରି କରିନପାରି ଦୀର୍ଘ ଦିନ ହେଲା କେବଳ ଆନ୍ଦୋଳନ କରିଆସୁଛନ୍ତି ମାତ୍ର କୌଣସି ସୁଫଳ ମିଳୁନାହିଁ । ଚାଷୀଙ୍କ ଶୋଚନୀୟ ଅବସ୍ଥା ଦେଖି ବରଗଡ ଓକିଲ ସଂଘ ମଧ୍ୟ ପୂର୍ବରୁ ଆନ୍ଦୋଳନ କରି ଚାଷୀଙ୍କ ସମସ୍ୟାର ଶୀଘ୍ର ସମାଧାନ କରିବାକୁ ପ୍ରଶାସନ ଉପରେ ଚାପ ପକାଇଥିଲା । ଆଜି କୋଶଳ ସେନା ପକ୍ଷରୁ ଗୋଡଭଗା ଠାରେ ରାସ୍ତାରୋକ ଆନ୍ଦୋଳନ କରି ଚାଷୀଙ୍କ ସମସ୍ତ ଅମଳ ଧାନକୁ ଉଠାଇବା ସହିତ ସ୍ବତନ୍ତ୍ର କୋଶଳ ପ୍ରଦେଶ ଗଠନ ପାଇଁ ଦାବି କରିଛନ୍ତି । ସରକାରଙ୍କ ଟୋକନ ସିଷ୍ଟମ ଆରମ୍ଭ ହେବା ଦିନଠାରୁ ଚାଷୀମାନେ ଏପରି ସମସ୍ୟାର ସମ୍ମୁଖୀନ ହେଉଥିବାବେଳେ ସରକାରଙ୍କ ପ୍ରତି ଚାଷୀଙ୍କ ଆକ୍ରୋଶ ମନୋଭାବ ବଢିଚାଲିଛି ।
ବରଗଡରୁ ରାଜେଶ ସରାପ , ଇଟିଭି ଭାରତ