ମୁମ୍ବାଇ: ଫିଲ୍ମ'ଆରଆରଆର'ର ଗୀତ' ନାଟୁ ନାଟୁ' ପାଇଁ ଓସ୍କାର ଜିତି ଦେଶ ପାଇଁ ଗୌରବ ଆଣିବା ସହ ଏକ ଇତିହାସ ରଚିଛି । ଏହି ଐତିହାସିକ ସଫଳତା ପରେ ଏହି ଗୀତର କ୍ରେଜ୍ ସାରା ବିଶ୍ବରେ ଦେଖିବାକୁ ମିଳିଛି । ଆଜି ବି ଲୋକେ ଏହି ଗୀତରେ ଝୁମୁଥିବାର ନଜର ଆସିଛନ୍ତି । ଏହାରି ମଧ୍ୟରେ ବର୍ତ୍ତମାନ ୟୁଏଇର ବାସିନ୍ଦାଙ୍କୁ ଓସ୍କାର ବିଜେତା ଗୀତ 'ନାଟୁ-ନାଟୁ'ରେ ସେମାନଙ୍କର ଡ୍ୟାନ୍ସ ଦକ୍ଷତା ପ୍ରଦର୍ଶନ କରିବାକୁ ସୁଯୋଗ ଦେଇଛି ଭାରତୀୟ ଦୂତାବାସ । ସୋସିଆଲ ମିଡିଆ ଜରିଆରେ ଭାରତୀୟ ଦୂତାବାସ ଏହି ସୂଚନା ଦେଇଛି ।
ସୋମବାର ସଂଯୁକ୍ତ ଅରବ ଅମିରାତରେ ଥିବା ଭାରତର ଦୂତାବାସ ୟୁଏଇ ନାଗରିକମାନଙ୍କ ପାଇଁ ଫିଲ୍ମ 'RRR'ର 'ନାଟୁ ନାଟୁ' ଗୀତରେ ସେମାନଙ୍କ ଡ୍ୟାନ୍ସ କ୍ଲିପ୍ ଦେବା ପାଇଁ ଏକ ପ୍ରତିଯୋଗିତା ଆରମ୍ଭ କରିଛି । ବିଜେତାମାନେ ମିଶନରେ ପରଫରମାନ୍ସ କରିବାର ସୁଯୋଗ ପାଇବେ । ୟୁଏଇରେ ଥିବା ଭାରତୀୟ ଦୂତାବାସ ଏହାର ଅଫିସିଆଲ୍ ଟ୍ବିଟର ହ୍ୟାଣ୍ଡେଲରେ ଏକ ଟ୍ୱିଟ୍ କରିଛନ୍ତି ଯେଉଁଥିରେ ଭିଡିଓ କ୍ଲିପ୍ ସହିତ QR କୋଡ୍ ଦିଆଯାଇଛି । ଏହା ଟ୍ୱିଟ୍ କରି ଭାରତୟୀ ଦୂତାବାସ ପକ୍ଷରୁ କୁହାଯାଇଛି, 'ନାଟୁ-ନାଟୁ'ର 30 ସେକେଣ୍ଡର ଗୀତ ଆପଣଙ୍କୁ ଭାରତୀୟ ଦୂତାବାସରେ ପରଫର୍ମ କରିବାର ସୁଯୋଗ ଦେଇପାରେ । 3 ସରଳ ଉପାୟ ଦେଇଛି ଭାରତୀୟ ଦୂତାବାସ। ପ୍ରଥମେ 16 ଏପ୍ରିଲ ପୂର୍ବରୁ ଇନ୍ଷ୍ଟାଗ୍ରାମରେ ନାଟୁ-ନାଟୁ ଗୀତରେ ଗ୍ରୁପ ପରଫର୍ମାନ୍ସ ସେୟାର କରିିବାକୁ ହେବ । ଦ୍ବିତୀୟରେ, ଇନ୍ଷ୍ଟାରେ ଭାରତୀୟ ଦୂତାବାସକୁ ଟ୍ୟାଗ୍ କରିବାକୁ ହେବ । ଶେଷରେ QR କୋଡ୍ ଅନୁସରଣ କରିବାକୁ ହେବ । ଯିଏ ବିଜେତା ହେବେ ସେ ଦୂତାବାସରେ ପରଫର୍ମ କରିବାର ସୁଯୋଗ ପାଇବେ । ସୋସିଆଲ ମିଡିଆରେ ଏହି ପୋଷ୍ଟ ସେୟାର ପରେ ଫ୍ୟାନ୍ସ ଏହାକୁ ଲାଇକ୍ କରିବା ସହ ଏନେଇ ଉତ୍ସାହିତ ଥିବା ଦେଖିବାକୁ ମିଳିଛି ।