ନୂଆଦିଲ୍ଲୀ: 100ଦିନର ରେକର୍ଡ ଭାଙ୍ଗିଲା ସେୟାର ବଜାର । ଐତିହାସିକ ସ୍ତରରେ ସେୟାର ସୂଚକାଙ୍କ । ଜୋରଦାର ଅଭିବୃଦ୍ଧି ଜାରି । ପ୍ରଫିଟ ଗାଦିରେ ନିବେଶକ । ଗୁରୁବାର 40 ହଜାର ଡେଇଁ ସର୍ବୋର୍ଚ୍ଚ ସ୍ତରରେ ସେନସେକ୍ସ ।
ଗତ 4 କାରବାର ଦିନରେ ସେନସେକ୍ସ 1000 ପଏଣ୍ଟ ଉଛୁଳିଛି । ଏଥିଯୋଗୁଁ ମାଲାମାଲ ନିବେଶକ । ଆଜିକୁ ଠିକ 100ଦିନ ପୂର୍ବରୁ ଅର୍ଥାତ ଜୁନ 4ରେ ସେନସେକ୍ସ 40,312 ଛୁଇଁଥିଲା । ଯାହାକି ଆଜି ଅପରାହ୍ନ ସୁଦ୍ଧା ସବୁ ରେକର୍ଡ ଭାଙ୍ଗି 40,344ରେ ପହଞ୍ଚିଛି ।
ବମ୍ବେ ଷ୍ଟକ ଏକ୍ସଚେଞ୍ଜର (ବିଏସଇ) 30 ସେୟାର ଉପରେ ଆଧାରିତ ସୂଚକାଙ୍କ ସେନସେକ୍ସ ଦିନ 11.30ରେ 263.69 ପଏଣ୍ଟ ବୃଦ୍ଧି ପାଇ 40,315.56ରେ ଚାଲିଥିଲା । ସେପଟେ ନ୍ୟାସନାଲ ଷ୍ଟକ ଏକ୍ସଚେଞ୍ଜର (ଏନଏସଇ) 50 ସେୟାର ଉପରେ ଆଧାରିତ ସୂଚକାଙ୍କ ନିଫ୍ଟି 71.85ପଏଣ୍ଟ ଅଭିବୃଦ୍ଧି ସହ 11,915.95 ରେ କାରବାର କରୁଥିଲା ।