ପୁରୀ: ମହାପ୍ରଭୁ ଶ୍ରୀଜଗନ୍ନାଥଙ୍କୁ ପୁଣି ଅପମାନ । ପୁରୀ କୃଷ୍ଣପ୍ରସାଦ ବ୍ଲକ୍ ମାଲୁଦରେ ନଜରକୁ ଆସିଛି ଏହି ଅଭାବନୀୟ ଘଟଣା । ସଭାକାର୍ଯ୍ୟ ସରିବା ପରେ ଟେଣ୍ଟ୍ ହାଉସ୍ ମାଲିକ ମହାପ୍ରଭୁଙ୍କ ମୂର୍ତ୍ତିକୁ ପଡିଆ ମଝିରେ ଖୋଲାରେ ଛାଡି ପଳାଇଗଲେ । ଦିନେ କି ଦୁଇ ଦିନ ନୁହେଁ, ଦୀର୍ଘ ୨ ଦିନ ଧରି ମହାପ୍ରଭୁ ଶ୍ରୀଜଗନ୍ନାଥଙ୍କ ମୂର୍ତ୍ତିକୁ ଡହ ଡହ ଖରାରେ ଖୋଲା ପଡିଆ ମଝିରେ ପରିତ୍ୟକ୍ତ ଅବସ୍ଥାରେ ଛାଡି ଚାଲିଗଲେ । ଏହି ଦୃଶ୍ୟ ନଜରକୁ ଆସିବା ପରେ ଜଗନ୍ନାଥପ୍ରେମୀଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ମହାପ୍ରଭୁଙ୍କ ପ୍ରତିମୂର୍ତ୍ତିକୁ ଅପମାନ କରିଥିବା ବ୍ୟକ୍ତି ବିଶେଷଙ୍କ ବିରୋଧରେ ଦୃଢ଼ କାର୍ଯ୍ୟନୁଷ୍ଠାନ ପୁରୀ ଜିଲ୍ଲା ପ୍ରଶାସନ ନେବାକୁ ଜଗନ୍ନାଥ ପ୍ରେମୀ ଦାବି କରିଛନ୍ତି ।
ସୂଚନା ଅନୁଯାୟୀ ଗତ ୧୯ ତାରିଖରେ କୃଷ୍ଣପ୍ରସାଦ ବ୍ଲକ ମାଲୁଦ ପଞ୍ଚୁଦୋଳ ପଡ଼ିଆରେ ବିଜୁ ଜନତା ଦଳ ପକ୍ଷରୁ ଏକ ନିର୍ବାଚନୀ ସଭା ଅନୁଷ୍ଠିତ ହେଇଥିଲା । କାର୍ଯକ୍ରମରେ ବ୍ରହ୍ମଗିରି ନିର୍ବାଚନ ମଣ୍ଡଳୀର ବିଜେଡି ପ୍ରାର୍ଥୀ ଉମାକାନ୍ତ ସାମନ୍ତରାୟ ଉପସ୍ଥିତ ଥିଲେ । ତେବେ ବହୁ ଆଡମ୍ବରରେ ନିର୍ବାଚନୀ ସଭା ଅନୁଷ୍ଠିତ ହୋଇଥିଲା । ହେଲେ ନିର୍ବାଚନୀ ସଭା ସରିବା ପରେ ଟେଣ୍ଟ୍ ହାଉସ୍ ମାଲିକ ସବୁ ସାମଗ୍ରୀ ନେଇଥିବା ବେଳେ ମହାପ୍ରଭୁଙ୍କ ମୂର୍ତ୍ତି ସହ କିଛି ସାମଗ୍ରୀ ପଡିଆରେ ଦୁଇ ଦିନ ହେବ ରଖିଥିଲେ । ମହାପ୍ରଭୁ ଜଗନ୍ନାଥଙ୍କ ମୂର୍ତ୍ତିକୁ ଏକ ଅଖାରେ ଗୁଡ଼ାଇ ରଖିଥିଲେ । ତେବେ ପବନ ଯୋଗୁଁ ଅଖା ବସ୍ତାଟି ଚିରି ଯିବାରୁ ଏହା ଭିତରେ ମହାପ୍ରଭୁଙ୍କ ମୂର୍ତ୍ତି ଥିବା ଦେଖାଯାଇଥିଲା । ଧୁ ଧୁ ଖରାରେ ପଡି ରହିଥିଲେ ପ୍ରଭୁ ଜଗନ୍ନାଥ । ସେହି ଦୃଶ୍ୟ ଦେଖି ସ୍ଥାନୀୟ ଲୋକେ ଆଉ ସହିପାରିନଥିଲେ । ଏଭଳି ଅପମାନ କରିଥିବା ବ୍ୟକ୍ତି ବିଶେଷକୁ କଡ଼ା ସମାଲୋଚନା ପରେ ମହାପ୍ରଭୁଙ୍କ ମୂର୍ତ୍ତିକୁ ସ୍ଥାନୀୟ ଲୋକେ ଉଦ୍ଧାର କରିଥିଲେ ।