തിരുവനന്തപുരം:സ്‌കൂള്‍ ഉച്ചഭക്ഷണത്തിന് ഭക്ഷ്യ സുരക്ഷ ലൈസന്‍സ് വേണ്ടെന്ന പൊതുവിദ്യാഭ്യാസ വകുപ്പിന്‍റെ ഉത്തരവ് പിന്‍വലിക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന് പ്രതിപക്ഷ നേതാവ് വി ഡി സതീശന്‍ കത്തയച്ചു. നിരവധി തവണ സ്‌കൂളുകളില്‍ ഭക്ഷ്യ വിഷബാധയേറ്റ സംഭവങ്ങള്‍ സംസ്ഥാനത്തുണ്ടായിട്ടുണ്ടെന്ന് പ്രതിപക്ഷ നേതാവിന്‍റെ കത്തില്‍ പറയുന്നു.
സ്‌കൂളുകളില്‍ ഭക്ഷണത്തിന് ഗുണനിലവാര പരിശോധന വേണ്ടെന്ന തീരുമാനം പ്രതിഷേധാര്‍ഹവും നിരുത്തരവാദപരവുമാണ്. വെങ്ങാനൂര്‍ ഉച്ചക്കട എല്‍ പി സ്‌കൂള്‍, കായംകുളം ടൗണ്‍ സര്‍ക്കാര്‍ യു പി സ്‌കൂള്‍, കോഴിക്കോട് കീഴ്പ്പയ്യൂര്‍ വെസ്‌റ്റ് എല്‍ പി സ്‌കൂള്‍, ജി വി രാജ സ്‌പോര്‍ട്‌സ് സ്‌കൂള്‍, നെയ്യാറ്റിന്‍കര തത്തിയൂര്‍ പിവിയുപിഎസ് എന്നിവിടങ്ങളില്‍ ഭക്ഷ്യ വിഷബാധയേറ്റ സംഭവമുണ്ടായിട്ടുണ്ട്. ഈ സാഹചര്യത്തിലും ഭക്ഷണത്തിന്‍റെ ഗുണനിലവാര പരിശോധന വേണ്ടെന്ന തീരുമാനം നിരുത്തരവാദപരമാണ്.