തിരുവനന്തപുരം: കെഎസ്ആർടിസിയിൽ അനധികൃതമായി ജോലിക്ക് ഹാജരാകാത്ത 10 സ്ഥിര വിഭാഗം ഡ്രൈവർമാരെ സ്ഥലം മാറ്റി. നാല് ബദലി വിഭാഗം ഡ്രൈവർമാരെ സർവീസിൽ നിന്നും മാറ്റി നിർത്തുകയും ചെയ്‌തു. പത്തനാപുരം യൂണിറ്റിൽ ഏപ്രിൽ 29, 30 തീയതികളിൽ മദ്യപിച്ച് ജോലിക്കെത്തുന്നവരെ കണ്ടെത്താൻ സ്‌ക്വാഡ് പരിശോധന നടത്തിപ്പോൾ അനധികൃതമായി ഡ്യൂട്ടിക്ക് ഹാജരാകാതിരുന്ന ജീവനക്കാർക്കെതിരെയാണ് മാനേജ്മെന്‍റ് നടപടി.
ജീവനക്കാർ മുന്നറിയിപ്പ് ഇല്ലാതെ അവധിയെടുത്തത് കാരണം 1,88,665 രൂപയുടെ സാമ്പത്തിക നഷ്‌ടം ഉണ്ടായതിനെ തുടർന്നാണ് നടപടി സ്വീകരിച്ചതെന്ന് കെഎസ്‌ആര്‍ടിസി എംഡി പ്രമോജ് ശങ്കർ വാർത്താക്കുറിപ്പിൽ അറിയിച്ചു. അന്നത്തെ ദിവസം ജീവനക്കാർ അവധി എടുത്തതോടെ പത്തനാപുരം യൂണിറ്റിലെ നിരവധി സർവീസുകൾ റദ്ദ് ചെയ്യേണ്ട സാഹചര്യം ഉണ്ടായിരുന്നു.