ഇസ്ലാമാബാദ്: പാകിസ്ഥാൻ സൂപ്പർ ലീഗ് (Pakistan Super League) മത്സരത്തിനിടെ മുൻ പാകിസ്ഥാൻ ക്യാപ്റ്റൻ ബാബർ അസമിനെ (Babar Azam ) കളിയാക്കി ഒരു കൂട്ടം ആരാധകര്‍. പാകിസ്ഥാന് സൂപ്പര്‍ ലീഗില്‍ പെഷവാർ സാൽമി (Peshawar Zalmi) ക്യാപ്റ്റന്‍റെ നായകനാണ് ബാബര്‍ അസം. ടീമിന്‍റെ മത്സരത്തിനിടെ ടെക്‌നിക്കൽ സ്റ്റാഫിനൊപ്പം ഇരിക്കവെ 'സിംബാബാർ' എന്ന് വിളിച്ചാണ് ഒരു കൂട്ടം പാക് ആരാധകര്‍ ബാബറിനെ കളിയാക്കിയത്.
ആരാധകരുടെ പ്രവര്‍ത്തിയില്‍ പ്രകോപിതനാവുന്ന 29-കാരന്‍റെ വീഡിയോ സോഷ്യല്‍ മീഡിയയില്‍ വൈറലാണ്. ഇക്കൂട്ടര്‍ക്ക് എതിരെ രൂക്ഷമായി നോക്കുകയും എന്തൊക്കെയോ പറഞ്ഞുകൊണ്ട് തന്‍റെ കയ്യിലുണ്ടായിരുന്ന കുപ്പി എറിയുമെന്ന് ആംഗ്യം കാണിക്കുകയും ചെയ്യുന്ന ബാബറിനെയാണ് വീഡിയോയില്‍ കാണാന്‍ കഴിയുന്നത്.
നിലവില്‍ പാകിസ്ഥാന്‍റെ ഏറ്റവും മികച്ച താരങ്ങളില്‍ ഒരാളാണ് ബാബര്‍ അസം. പക്ഷെ, അടുത്ത കാലത്തായി പാക്കിസ്ഥാനുവേണ്ടിയുള്ള പ്രധാന മത്സരങ്ങളിൽ തന്‍റെ മികവിലേക്ക് ഉയരാന്‍ താരത്തിന് കഴിഞ്ഞിട്ടില്ല. ഇന്ത്യയില്‍ നടന്ന ഏകദിന ലോകകപ്പില്‍ ഉള്‍പ്പെടെ ബാബര്‍ നിറം മങ്ങുന്നതാണ് കാണാന്‍ കഴിഞ്ഞത്.
ഇതോടെ സിംബാബ്‌വെയ്‌ക്ക് എതിരായ മത്സരങ്ങളില്‍ മാത്രമാണ് താരത്തിന് മികവ് പുലര്‍ത്താന്‍ കഴിയുന്നതെന്നാണ് വിമര്‍ശകര്‍ പറയാറുള്ളത്. സിംബാബ്‌വെയ്‌ക്കെതിരെ ക്രിക്കറ്റിന്‍റെ എല്ലാ ഫോർമാറ്റുകളിലുമായി 18 മത്സരങ്ങൾ കളിച്ചിട്ടുള്ള ബാബർ 57.75 ശരാശരിയിൽ 693 റൺസ് നേടിയിട്ടുണ്ട്.