पुणे -शहरावरील कोरोनाचे संकट पुन्हा एकदा गडद होताना दिसते आहे. आज (शुक्रवारी) १२ मार्चला दिवसभरात १८०५ नव्या पॉझिटिव्ह रुग्णांची नोंद करण्यात आली आहे. तर १३ बाधितांचा मृत्यू झाला. शहरात कोरोना रुग्णांच्या संख्येत दिवसागणिक मोठी वाढ होत आहे. त्यामुळे प्रशासनाचे धाबे दणाणले आहे.
३४१ क्रिटिकल रुग्ण -
शहरात गेल्या काही दिवसात दररोज १५०-२०० नवे रुग्ण शहरात आढळून येत आहेत. आज दिवसभरात ८ हजार ८६०२ नमुन्यांची (स्वॅब) तपासणी करण्यात आली. तर दिवसभरात ५९८ रुग्णांना डिस्चार्ज देण्यात आला. तर मागील २४ तासांत १३ कोरोना बाधितांचा मृत्यू झाला आहे. यातील ५ रूग्ण पुण्याबाहेरील आहेत. सध्या ३४१ क्रिटिकल रुग्णांवर उपचार सुरू आहेत.
पुण्यात एकूण बाधितांची संख्या २ लाख १४ हजार ८३०वर पोहोचली आहे. तर सध्या पुण्यातील ॲक्टिव्ह रुग्णसंख्या ९७४० इतकी आहे. आजपर्यत ४ हजार ९२५ बाधितांचा मृत्यू झाला आहे. तर एकूण २ लाख १६५ जणांना डिस्चार्ज देण्यात आला आहे.
कोरोनामुळे रात्रीची संचारबंदी -
राज्यात सगळीकडे पुन्हा कोरोनाचे प्रमाण वाढताना दिसत आहे. मध्यंतरी लॉकडाऊनमुळे कोरोनाच्या रुग्णांमध्ये घट झाली होती. मात्र, लॉकडाऊन हटवल्यानंतर पुन्हा कोरोनाच्या रुग्णांत झपाट्याने वाढ होत आहे. पुण्यात कोरोना रुग्णांचे प्रमाण जास्त असल्यामुळे यावर आळा घालण्यासाठी प्रशानसनाने रात्री अकरा ते पहाटे पाचवाजेपर्यंत संचारबंदी लागू करण्यात आली आहे.